ភ្នំពេញ៖ ឧស្សាហកម្មអភិវឌ្ឍន៍ថ្នាំពេទ្យ តែងតែជួបប្រទះបញ្ហាដោយការកើនឡើងនូវការចំណាយក្នុងការអភិវឌ្ឍ និងការស្រាវជ្រាវត្រូវចំណាយពេលយូរ ដើម្បីទទួលបានថ្នាំដែលអាចប្រើប្រាស់បាន និងដាក់លក់នៅទីផ្សារ។

ការធ្វើតេស្តថ្នាំនីមួយៗ ត្រូវចំណាយជាមធ្យមប្រមាណ ១,៣ប៊ីលានដុល្លារ នេះបើយោងតាមការសិក្សារបស់ CBINSIGHTS ហើយមានតែ ១០% ប៉ុណ្ណោះនៃថ្នាំទាំងនោះ ត្រូវបាននាំចូលទៅក្នុងទីផ្សារដោយជោគជ័យ។ ជាមួយគ្នានេះ ការរួមបញ្ចូល AI ទៅក្នុងដំណើរការអភិវឌ្ឍថ្នាំត្រូវបានមើលឃើញថា បានជួយបង្កើនល្បឿន កាត់បន្ថយចំណាយ និងភាពស្មុគស្មាញនៅក្នុងដំណើរការអភិវឌ្ឍនេះ។

បច្ចេកវិទ្យានេះ ជួយវិភាគសំណុំទិន្នន័យជីវសាស្ត្រ, ទស្សន៍ទាយពីរបៀបដែលម៉ូលេគុលនឹងមានអន្តរកម្មជាមួយគោលដៅជំងឺជាក់លាក់ និងកំណត់អត្តសញ្ញាណសមាសធាតុដែលរំពឹងទុកសម្រាប់ការធ្វើតេស្តបន្ថែមទៀត៕