ភ្នំពេញ៖ ការកើនឡើង នៃGenerative Al ជាផ្នែកមួយ នៃ AI ដែលផ្ដោតសំខាន់លើការបង្កើតទិន្នន័យថ្មីទាំងស្រុង ដែលខុសពី Al បែបប្រពៃណីផ្ដោតសំខាន់តែលើការវិភាគទិន្នន័យដែលមានស្រាប់សម្រាប់ការដោះស្រាយបញ្ហា ឬការព្យាករ។

ជាមួយគ្នានេះ ការកើនឡើងនៃ Generative Al គឺជាការផ្លាស់ប្តូរដ៏សំខាន់មួយនៅក្នុងរបៀបរបបដែលយើងបង្កើតធ្វើអន្តរកម្ម និងយល់ពីខ្លឹមសារឌីជីថល គិត ចាប់ពីសិល្បៈ និងការសរសេរ រហូតដល់ការអភិវឌ្ឍកម្មវិធី និងការវិភាគទិន្នន័យធំៗ ដែលទាំងនេះបាននិងកំពុងផ្លាស់ប្តូរឧស្សាហកម្មទាំងអស់ នៅលើសកលលោក។

បច្ចេកវិទ្យាទាំងនេះ កំពុងបង្ហាញពីឱកាសជាច្រើនសម្រាប់ការច្នៃប្រឌិត Generative Al ក៏ចាំបាច់ឱ្យយើងជា អ្នកប្រើប្រាស់គប្បីគួរឈ្វេងយល់ឱ្យបានច្បាស់អំពីក្រមសីលធម៌ ដែលទាមទារឱ្យមានការគិតគូរប្រកបដោយការពិចារណាមុននឹងប្រើប្រាស់ ពោល គឺព្យាយាមប្រើប្រាស់បច្ចេកវិទ្យានេះឱ្យបានអស់ពីលទ្ធភាព និងប្រើប្រាស់ ក្នុងផ្លូវត្រូវ សំដៅមិនប៉ះពាល់ដល់បុគ្គល ឬសង្គម។

គួរបញ្ជាក់ថា បញ្ញាសិប្បនិម្មិត បានក្លាយជាផ្នែកមួយយ៉ាងសំខាន់នៃជីវិតរស់នៅប្រចាំថ្ងៃ របស់យើងទាំងអស់ មិនថានៅក្នុងការធ្វើការងារ, ការប្រកបអាជីវកម្មតូច ធំ, ធុរកិច្ចថ្មី ឬការសិក្សាឡើយ គឺសុទ្ធសឹងតែមានវត្តមានរបស់បច្ចេកវិទ្យា៕