ភ្នំពេញ៖ ឯកឧត្តម សេង សក្តា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បើកកិច្ចប្រជុំក្រុមការងារបច្ចេកទេសកម្ពុជា-ថៃ ដើម្បីបើកកិច្ចពិភាក្សាការងារ ស្វែងរកដំណោះស្រាយរួមគ្នា លើការលើកកម្ពស់សិទ្ធិដល់ពលករទេសន្តរប្រវេសន៍ ដែលកំពុងធ្វើការនៅប្រទេសថៃ។

ក្នុងកិច្ចពិភាក្សាការងារ កាលពីថ្ងៃទី២២ ខែមេសា ឆ្នាំ២០២៥ ឯកឧត្តមរដ្ឋលេខាធិការក្រសួងការងារ បានវាយតម្លៃខ្ពស់ចំពោះកិច្ចសហការប្រតិបត្តិការនានារវាងរាជរដ្ឋាភិបាលប្រទេសទាំងពីរ លើវិស័យការងារ ជាពិសេសពលករទេសន្តរប្រវេសន៍ ដែលឆ្លុះបញ្ចាំងពីទំនាក់ទំនងដ៏ល្អ រវាងប្រទេសកម្ពុជា និងថៃ។ ឯកឧត្តម សេង សក្តា មានជំនឿថា កិច្ចប្រជុំក្រុមការងារបច្ចេកទេសកម្ពុជា-ថៃ នៅពេលនេះ នឹងទទួលបានលទ្ធផលជាផ្លែផ្កាក្រោមស្មារតីមិត្តភាព និងកិច្ចសហប្រតិបត្តិការល្អប្រសើរ ដើម្បីជាប្រយោជន៍ដល់កិច្ចគាំពារសិទ្ធិដល់ពលករទេសន្តរប្រវេសន៍។

ឯកឧត្តម Somchai Morakotsariwan អគ្គនាយក នៃនាយកដ្ឋានមុខរបរ នៃក្រសួងការងាររបស់ថៃ ជឿថា កិច្ចប្រជុំក្រុមការងារបច្ចេកទេសកម្ពុជា-ថៃ នឹងទទួលបានធាតុចូលសំខាន់ៗជាច្រើនក្នុងការកែសម្រួលនីតិវីធីមួយចំនួន ដើម្បីជួយសម្រួលឱ្យកាន់តែប្រសើរឡើងដល់បងប្អូនពលករខ្មែរ ដែលកំពុងធ្វើការនៅប្រទេសថៃ។ ឯកឧត្តម Somchai Morakotsariwan ក៏បានគូសបញ្ជាក់ពីកិច្ចសហការយ៉ាងល្អរវាងរាជរដ្ឋាភិបាលប្រទេសទាំងពីរ លើការគ្រប់គ្រងពលករទេសន្តរប្រវេសន៍ នាពេលកន្លងមក។ ក្នុងនោះក្រសួងការងារថៃ វាយតម្លៃខ្ពស់ចំពោះការយកចិត្តទុកដាក់ពីភាគីកម្ពុជា ជាពិសេសក្រសួងការងារ និងបណ្តុះបណ្តាលវិជ្ជាជីវៈកម្ពុជាដែលជាសេនាធិការ។

ពាក់ព័ន្ធនឹងកិច្ចប្រជុំនេះដែរ ភាគីទាំងពីរ បានចុះហត្ថលេខាលើការកំណត់ហេតុ នៃកិច្ចប្រជុំក្រុមការងារបច្ចេកទេសកម្ពុជា-ថៃ ដើម្បីអនុវត្តកិច្ចព្រមព្រៀង ស្តីពីការប្រើប្រាស់កម្លាំងពលកម្ម រវាងរាជរដ្ឋាភិបាល នៃ កម្ពុជា និងថៃផងដែរ។ នេះបើតាមការចុះផ្សាយរបស់ ក្រសួងការងារ កាលពីថ្ងៃទី២២ ខែមេសា ឆ្នាំ២០២៥៕