ភ្នំពេញ៖ ការលេងតុងទីន គឺជាការខ្ចីសាច់ប្រាក់យកមកប្រើប្រាស់ជាមុន ដែលធ្វើឡើងក្នុងចំណោមក្រុមនៃមនុស្សច្រើននាក់ ដែលត្រូវបង់សាច់ប្រាក់ត្រឡប់ទៅវិញជាប្រចាំ តាមកាលកំណត់ដោយមានអត្រាការប្រាក់ប្រែប្រួលទៅតាមគ្រានីមួយៗ។ នេះបើតាមពុទ្ធិមូលបត្រ ដែលចេញផ្សាយដោយនិយ័តករមូលបត្រកម្ពុជា នាថ្ងៃទី៣០ ខែធ្នូ ឆ្នាំ២០២៤។

អត្រាការប្រាក់នេះ អាចទទួលបានតិច ឬច្រើន អាស្រ័យលើការដេញថ្លៃរបស់កូនតុងទីន ដែលមានបំណងយកសាច់ប្រាក់នោះទៅប្រើប្រាស់ជាមុន ប្រសិនបើកូនតុងទីនជ្រើសរើសដេញក្រោយគេ បុគ្គលនោះនឹងទទួលបាននូវសាច់ប្រាក់ច្រើន រួមបញ្ចូលទាំងប្រាក់ដើម និងការប្រាក់។ ជាមួយគ្នានេះ តុងទីន ជាមធ្យោបាយវិនិយោគដ៏ពេញនិយមក្នុងប្រទេសកម្ពុជា ដែលស្ថិតក្នុងប្រព័ន្ធហិរញ្ញវត្ថុក្រៅផ្លូវការ និងមានលក្ខណៈស្រដៀងទៅនឹងការដាក់ប្រាក់សន្សំក្នុងធនាគារដែរ ប៉ុន្តែអាចទទួលបានអត្រាការប្រាក់ខ្ពស់ជាងធនាគារ។

បើតាមពុទ្ធិមូលបត្រ តុងទីន ជាមធ្យោបាយវិនិយោគដែលមានហានិភ័យខ្ពស់ ព្រោះពុំមានកិច្ចសន្យា ឬកិច្ចព្រមព្រៀងជាលាយលក្ខណ៍អក្សរច្បាស់លាស់ណាមួយ ឬមានការគ្រប់គ្រងដោយអាជ្ញាធរណាមួយឡើយ។ គួរបញ្ជាក់ថា តុងទីន មានដើមកំណើតពីប្រទេសបារាំង ដែលបង្កើតឡើងដោយលោក Lorenzo de Tonti ដែលមានសញ្ញាតិដើមជាជនជាតិអ៊ីតាលី៕