ភ្នំពេញ៖ សេចក្តីព្រាងផែនការមេសម្រាប់ការអភិវឌ្ឍវិស័យមូលបត្រ គ.ស.២០២៥-២០៣៥ នឹងចូលរួមអភិវឌ្ឍន៍វិស័យមូលបត្រឱ្យកាន់តែរីកចម្រើនទៅមុខជាលំដាប់ថែមទៀត។ នេះបើតាមសេចក្តីប្រកាសព័ត៌មានរបស់និយ័តករមូលបត្រកម្ពុជា (ន.ម.ក.) នាថ្ងៃទី០៣ ខែវិច្ឆិកា ឆ្នាំ២០២៤។

ន.ម.ក. បានឱ្យដឹងថា សិក្ខាសាលាពិគ្រោះយោបល់ ស្តីពី «សេចក្តីព្រាងផែនការមេសម្រាប់ការអភិវឌ្ឍវិស័យមូលបត គ.ស.២០២៥-២០៣៥» គឺរៀបចំ ដើម្បីទទួលបានមតិយោបល់បន្ថែម និងប្រមូលធាតុចូលពី គ្រប់ភាគីពាក់ព័ន្ធ ដើម្បីឱ្យផែនការមេនេះ មានភាពមុតស្រួច គ្រប់ជ្រុងជ្រោយ បរិយាបន្ន និងនវានុវត្តន៍។

ការរៀបចំសិក្ខាសាលានេះ ក៏ដើម្បីឆ្លើយតបទៅនឹងនិន្នាការនៃការអភិវឌ្ឍក្នុងប្រទេស និងសកល ក្នុងសម័យសាកលភាវូបនីយកម្ម និងឌីជីថលូបនីយកម្ម ដើម្បីឱ្យផែនការមេនេះអាចដាក់ឱ្យអនុវត្តប្រកបដោយប្រសិទ្ធភាព។ ជាមួយគ្នានេះ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃន.ម.ក. បានលើកឡើងថា ឯកសារយុទ្ធសាស្ត្រនេះ ជាឯកសារយុទ្ធសាស្ត្រសម្រាប់ ន.ម.ក. និងក្រុមហ៊ុនស្ថិតក្រោមនិយ័តកម្មរបស់ ន.ម.ក. យកទៅអនុវត្ត ដូចនេះធាតុចូលពីភាគីពាក់ព័ន្ធ គឺពិតជាសំខាន់ណាស់ក្នុងការសម្រេចគោលដៅរួមរបស់ ន.ម.ក.៕