ភ្នំពេញ៖ ក្នុងគោលបំណងពង្រឹងទំនាក់ទំនង និងកិច្ចសហប្រតិបត្តិការសេដ្ឋកិច្ចឱ្យកាន់តែច្រើន រដ្ឋមន្ត្រីការបរទេសចិន ស្វាគមន៍តាមសំណើរបស់រដ្ឋមន្ត្រីការបរទេសកម្ពុជា ដែលឱ្យភាគីចិនសិក្សាលទ្ធភាពពង្រីក ឬបង្កើតតំបន់សេដ្ឋកិច្ចពិសេសថ្មីបន្ថែម និងផ្តល់ការបណ្តុះបណ្តាលវិជ្ជាជីវៈសំដៅដល់ការបង្កើនចំនួនកម្លាំងពលកម្មជំនាញរបស់កម្ពុជា។

សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នាថ្ងៃទី២៥ ខែឧសភា ឆ្នាំ២០២៤ បានបញ្ជាក់ថា ភាគីចិន នឹងបន្តគាំទ្រគម្រោងអភិវឌ្ឍន៍ហេដ្ឋារចនាសម្ព័ន្ធធំៗនៅកម្ពុជា រួមមាន៖ ផ្នែកដឹកជញ្ជូន ឡូជីស្ទិក ប្រព័ន្ធស្រោចស្រព និងប្រព័ន្ធធារាសាស្ត្រ រួមទាំងគម្រោងគ្រប់គ្រងធនធានទឹកចម្រុះហ្វូណនតេជោ។ ជាមួយគ្នានេះ កម្ពុជា-ចិន ក៏បានឯកភាពគ្នាក្នុងការជំរុញកិច្ចសហប្រតិបត្តិការលើវិស័យដែលមានសក្តានុពលសំខាន់ៗ ដូចជា អប់រំ ទេសចរណ៍ កសិកម្មទំនើប ការតភ្ជាប់ សេដ្ឋកិច្ចឌីជីថល និងបញ្ញាសិប្បនិម្មិត។

ក្នុងជំនួបពិភាក្សាជាមួយឯកឧត្ដមឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ឯកឧត្តម វ៉ាង យី រដ្ឋមន្ត្រីការបរទេសចិន បានបញ្ជាក់អំពីការលើកទឹកចិត្ត ក្រុមហ៊ុន និងសហគ្រាសចិន ទៅវិនិយោគនៅកម្ពុជា ពិសេសពង្រីកការនាំចូលផលិតផលកសិកម្មពីកម្ពុជាទៅប្រទេសចិនថែមទៀត។

ការជួបពិភាក្សារវាងឯកឧត្ដម សុខ ចិន្តាសោភា និងឯកឧត្តម វ៉ាង យី នេះ ធ្វើឡើងក្នុងដំណើរបំពេញទស្សនកិច្ចផ្លូវការជាលើកដំបូងប្រកបដោយផ្លែផ្កានៅប្រទេសចិន ពីថ្ងៃទី២៣ ដល់ថ្ងៃទី២៥ ខែឧសភា ឆ្នាំ២០២៤ ដើម្បីលើកកម្ពស់ទំនាក់ទំនងក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ រួមមានកិច្ចសហប្រតិបត្តិការវិស័យនយោបាយ ការពារជាតិនិងសន្តិសុខ ពាណិជ្ជកម្មនិងវិនិយោគ ការអភិវឌ្ឍ ហេដ្ឋារចនាសម្ព័ន្ធ ការផ្លាស់ប្តូរវាងប្រជាជននិងប្រជាជន អប់រំ ទេសចរណ៍ និងវប្បធម៌៕