ភ្នំពេញ៖ ក្រុមហ៊ុន Molecor ជាក្រុមហ៊ុនមកពីប្រទេស​អេស្ប៉ាញដែលមានឯកទេសផលិតទុយោ និងតំណទឹកសម្រាប់ទីផ្សារជាង ៣០ ប្រទេសនៅលើពិភពលោក គ្រោងបង្កើតរោងចក្រនៅកម្ពុជា និងនាំយក​ដំណោះ​ស្រាយ​ផលិតផលទុយោដែលប្រើបច្ចេក​វិទ្យាកម្រិតខ្ពស់ សម្រាប់ផ្គត់ផ្គង់ដល់ប្រតិបត្តិករទឹកស្អាត លើក​កម្ពស់​ហេដ្ឋា​រចនាសម្ព័ន្ធ និងកាត់បន្ថយការលេចធ្លាយទឹក។ នេះបើតាមលោក Walter Philip Pattynama នាយកប្រតិបត្តិរបស់ក្រុមហ៊ុន Molecor ប្រចាំតំបន់ អាស៊ីអាគ្នេយ៍។

លោក Pattynama បានបង្ហាញអំពីក្រុមហ៊ុន Molecor ដែលកំពុងពង្រីកវត្តមាននៅក្នុងតំបន់​​អាស៊ី អាគ្នេយ៍ និងសំឡឹងឃើញកម្ពុជា ជាទីផ្សារសក្តានុពល ជាពិសេសខណៈដែលកម្ពុជាកំពុងផ្លាស់ប្ដូរឆ្ពោះទៅការអភិវឌ្ឍហេដ្ឋា​រចនា​សម្ព័ន្ធទឹកស្អាតដែលកាន់តែមានគុណភាពខ្ពស់។ លោក Pattynama បានលើកឡើងថា Molecor ជាក្រុមហ៊ុនផលិតទុយោដែលប្រើបច្ចេកវិទ្យាកម្រិតខ្ពស់ ហើយបេសកកម្មរបស់យើងគឺដើម្បីនាំយកទឹកស្អាតដែលមានតម្លៃសមរម្យ និងមានសុវត្ថិភាព​ជូន​ដល់​ប្រជាជន។

ក្នុងជំនួបនេះ ឯកឧត្ដម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ទឹកស្អាតមិនត្រឹមតែជាអាទិភាពសម្រាប់សុខភាពសាធារណៈ​ប៉ុណ្ណោះទេ ប៉ុន្តែជាកាតាលីករជំរុញបរិវត្តកម្មសេដ្ឋកិច្ចជនបទ និងការអភិវឌ្ឍវិស័យ​ឧស្សា​ហកម្ម។ ឯកឧត្ដម ហែម វណ្ណឌី បានបញ្ជាក់ថា កម្ពុជាស្វាគមន៍ក្រុមហ៊ុនដែលនាំយកនូវនវានុវត្តន៍ និងដំណោះស្រាយរយៈពេលវែង រួមទាំងបច្ចេកវិទ្យា ផលិតផលគុណភាពខ្ពស់ និងការអនុវត្តប្រកបដោយនិរន្តរភាព សម្រាប់ការអភិវឌ្ឍវិស័យទឹកស្អាតនៅកម្ពុជា៕