ភ្នំពេញ៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ ផ្តល់អនុសាសន៍ដល់ប្រតិភូយុវជននៃកម្មវិធីនាវាយុវជនអាស៊ីអាគ្នេយ៍និងជប៉ុន (SSEAYP) ចំនួន ១៨រូប លើកទី៤៩ ជួយផ្សព្វផ្សាយពីតថភាពពិត ការអភិវឌ្ឍ ក៏ដូចជាឱកាសវិនិយោគដ៏ច្រើននៅកម្ពុជា ទៅដល់អ្នកវិនិយោគនិងមិត្តភក្តិបរទេស។

ក្នុងឱកាសសំណេះសំណាល និងផ្តល់អនុសាសន៍ នាថ្ងៃទី១៣ ខែមករា ឆ្នាំ២០២៦ លោកជំទាវ សុវណ្ណ វណ្ណារតន៍ លោកជំទាវរដ្ឋលេខាធិការប្រចាំការ បានលើកទឹកចិត្តឱ្យយុវជនទាំងអស់ចេះប្រើប្រាស់ «ឱកាសមាស» នេះ ដើម្បីបង្ហាញពីសមត្ថភាព និងមោទនភាពជាតិ ក៏ដូចជាកសាងបណ្តាញទំនាក់ទំនងជាមួយយុវជន និងជនបរទេសក្នុងតំបន់ឱ្យបានល្អប្រសើរថែមទៀត។

លោកជំទាវ សុវណ្ណ វណ្ណារតន៍ រំពឹងថា ប្រតិភូយុវជននៃកម្មវិធី SSEAYP នឹងទទួលបានជោគជ័យក្នុងដំណើរការនៃកម្មវិធីនេះ ដើម្បីបង្កើនពុទ្ធិ ក្រេបយកចំណេះដឹង និងបទពិសោធបន្ថែមពីកម្មវិធី និងប្រតិភូយុវជនពីបណ្តាប្រទេសអាស៊ាន និងប្រទេសជប៉ុន ព្រមទាំងពាំនាំយកនូវចំណេះដឹង ចំណេះធ្វើ និងបទពិសោធវិលត្រឡប់មកចែករំលែកដល់យុវជនជំនាន់ក្រោយ ក៏ដូចជាប្រើប្រាស់សម្រាប់បម្រើការងារ និងមុខរបររៀងខ្លួននៅមាតុប្រទេសវិញ ក្នុងនាមជាមូលធនមនុស្សកម្ពុជាប្រកបដោយថាមពល និងថាមវន្ត ដើម្បីរួមចំណែកក្នុងការអភិវឌ្ឍសង្គម និងសេដ្ឋកិច្ចកម្ពុជា៕