ភ្នំពេញ៖ ការផ្សព្វផ្សាយរបស់សារព័ត៌មាន Thai Tribune និងផេកហ្វេសប៊ុក Army Military Force បានចោទប្រកាន់ថាកម្ពុជា ប្រើប្រាស់ទាហានស៊ីឈ្នួលបរទេសមកជួយបង្ហោះដ្រូនអត្តឃាតក្នុងជម្លោះព្រំដែនកម្ពុជា-ថៃ។ ទន្ទឹមនឹងនេះក្រសួងការពារជាតិកម្ពុជា ទាត់ចោលទាំងស្រុងនូវខ្លឹមសារដែលសារព័ត៌មានថៃ បានចោទប្រកាន់នេះ។

ក្រសួងការពារជាតិកម្ពុជា យល់ថាការបង្កើតនូវព័ត៌មានក្លែងក្លាយ ភូតកុហុក និងប្រឌិត របស់បណ្តាញសារព័ត៌មានថៃខាងលើនេះ គឺមានបំណងលាបពណ៌មកលើកម្ពុជា។ កម្ពុជា តាមរយៈក្រសួងការពារជាតិទាមទារឱ្យ ភាគីថៃបញ្ឈប់រាល់ការផ្សព្វផ្សាយព័ត៌មានមិនពិតដោយចេតនា ក្នុងគោលដៅបង្វែរការចាប់អារម្មណ៍អំពីការរំលោភបំពានច្បាប់អន្តរជាតិរបស់ខ្លួនដោយលាបពណ៌កម្ពុជា ដើម្បីយកលេសប្រើប្រាស់អាវុធកាន់តែសាហាវមកលើកម្ពុជា៕