ភ្នំពេញ៖ ធនាគារជាតិនៃកម្ពុជា រៀបចំកម្មវិធីប្រកួតធ្វើវីដេអូរ «តើប្រាក់ ១ម៉ឺនរៀល អាចទិញអ្វីបានខ្លះនៅខេត្តកំពង់ឆ្នាំង?» ដើម្បីលើកកម្ពស់ការប្រើប្រាស់ប្រាក់រៀល។ នេះបើតាមការចុះផ្សាយរបស់ ធនាគារជាតិ នាថ្ងៃទី២២ ខែតុលា ឆ្នាំ២០២៥។

ចំពោះបេក្ខជន ដែលទទួលបានជ័យលាភីលេខ១ នឹងទទួលបានទឹកប្រាក់ចំនួន ២លានរៀល ចំណែកជ័យលាភីលេខ២ ទទួលបានទឹកប្រាក់ចំនួន ១លានរៀល។ លក្ខខណ្ឌ ក្នុងការចូលរួម គឺត្រូវថតនៅក្នុងខេត្តកំពង់ឆ្នាំង, វីដេអូរត្រូវមានរយៈពេលពី ៤០វិនាទី ដល់ ៣នាទី, តាមដាន (Follow) ទំព័រហ្វ៊េសប៊ុកផ្លូវការធនាគារជាតិនៃកម្ពុជា, ផ្សព្វផ្សាយវីដេអូនៅលើគណនីហ៊្វេសបុក ឬ Tiktok ផ្ទាល់ខ្លួន ដោយមានភ្ជាប់ចំណងជើង #ទិវាប្រាក់រៀល២០២៥ #ខ្ញុំស្រឡាញ់ប្រាក់រៀល និង #ធនាគារជាតិនៃកម្ពុជា និង mention គណនីបណ្ដាញសង្គមផ្លូវការធនាគារជាតិនៃកម្ពុជា (ធនាគារជាតិ នៃកម្ពុជា - National Bank of Cambodia) និង (@nationalbankofcambodia_នៅលើ Tikto)។

វីដេអូរ ត្រូវបង្កប់អត្ថន័យពីសារសំខាន់ ការប្រើប្រាស់ប្រាក់រៀល ឬការប្រើប្រាស់ប្រាក់រៀលតាមបែបឌីជីថល។ គួរបញ្ជាក់ថា ត្រូវផ្ញើតំណភ្ជាប់វីដេអូ ដែលបានផ្សព្វផ្សាយមកក្នុងប្រអប់សារនៃហ្វ៊េសបុកផ្លូវការធនាគារជាតិនៃកម្ពុជា ត្រឹមថ្ងៃទី១៤ ខែវិច្ឆិកា ឆ្នាំ២០២៥។ ចំពោះជ័យលាភីនឹងទទួលរង្វាន់នៅក្នុងសិក្ខាសាលាផ្សព្វផ្សាយ ស្តីពី ប្រាក់រៀល ប្រព័ន្ធបាគង និងខេអេចឃ្យូអរ (KHQR) ដែលនឹងធ្វើឡើងនៅខេត្តកំពង់ឆ្នាំង នាថ្ងៃទី២៤ ខែវិច្ឆិកា ឆ្នាំ២០២៥៕