ភ្នំពេញ៖ ក្រសួងពាណិជ្ជកម្ម ក្រុមហ៊ុន Inoue Calcium Corporation និងក្រុមហ៊ុនហ៊ែនក្រាហ្វធីត ឃែស៊ូណាត់ ស្ទឹងត្រែង បានពិភាក្សាអំពីឱកាសវិនិយោគពង្រីកការកែច្នៃគ្រាប់ស្វាយចន្ទី ជាផលិតផលសម្រេច សម្រាប់នាំចេញទៅទីផ្សារជប៉ុន។

ជាមួយគ្នានេះ ឯកឧត្តម ឈរ ស៊ុនហុង អនុរដ្ឋលេខាធិការក្រសួងពាណិជ្ជកម្ម បានលើកទឹកចិត្តដល់គណៈប្រតិភូពាណិជ្ជករជប៉ុន ក្នុងសិក្សាស្វែងយល់អំពីផលិតផលសក្តានុពលកសិកម្មកម្ពុជានៅខេត្តស្ទឹងត្រែង តាមគោលការណ៍រាជរដ្ឋាភិបាលក្នុងការជំរុញការវិនិយោគ ពិសេសក្នុងភូមិភាគឦសាន ព្រមទាំងចាប់ដៃគូពាណិជ្ជកម្មជាមួយក្រុមហ៊ុនកម្ពុជា ដើម្បីសហការជំរុញការបណ្តាក់ទុន និងវិនិយោគ ក៏ដូចជានាំចេញ-នាំចូលផលិតផលរវាងប្រទេសទាំងពីរ។

បន្ថែមពីនេះ ឯកឧត្តម ឈរ ស៊ុនហុង បានបង្ហាញការសាទរចំពោះសិប្បកម្ម ហ៊ែនក្រាហ្វធីត ឃែស៊ូណាត់ ស្ទឹងត្រែង ដែលបាននាំចេញគ្រាប់ស្វាយចន្ទីជាផលិតផលសម្រេច ទៅទីផ្សារជប៉ុន កាលពីពេលថ្មីៗនេះ បានដោយជោគជ័យ និងគ្រោងនាំចេញបន្ថែមទៀតនៅឆ្នាំបន្ទាប់៕