ភ្នំពេញ៖ ក្រុមហ៊ុន City Rice Import Export Co., Ltd. អំពាវនាវឱ្យប្រជាកសិករនៅស្រុកថ្មគោល ខេត្ត បាត់ដំបង កុំបង្ខំសម្រុកច្រូតស្រូវច្រើនពេកក្នុងពេលតែមួយ ជៀសវាងការសល់ស្រូវនៅវាល ព្រោះសមត្ថភាពឡសម្ងួតរបស់ម៉ាស៊ីននីមួយៗមានកំណត់។

ក្រុមហ៊ុន City Rice Import Export បញ្ជាក់ថា ក្រុមហ៊ុន នឹងបន្តទិញស្រូវជារៀងរាល់ថ្ងៃពីកសិករ ដោយបច្ចុប្បន្ន ក្រុមហ៊ុន City Rice បានប្រមូលទិញស្រូវពីប្រជាកសិករនៅស្រុកថ្មគោល ខេត្ត បាត់ដំបង ប្រមាណជា ៥០ឡានធំ និង ៦០ឡានបែន ប្រចាំថ្ងៃ បើគិតជាបរិមាណប្រហែលជា ២ពាន់តោនក្នុងមួយថ្ងៃ។

សូមជម្រាបថា រដូវដែលកំពុងច្រូតកាត់នេះ ក្រុមហ៊ុន បានប្រមូលចូលស្រូវស្រងែ ប្រហែលជាង ៣ម៉ឺនតោន និងសែនក្រអូនប្រហែល ១ម៉ឺនតោន និងមានគម្រោងបន្តប្រមូលទិញពីប្រជាកសិករប្រមាណ ៦ម៉ឺនតោនទៀត ក្នុងរដូវនេះ៕