ភ្នំពេញ៖ ឯកឧត្តម ទៀ សីហា ឧបនាយករដ្ឋមន្ត្រី បានរាយការណ៍ជូន ឯកឧត្តម Dato’ Seri Mohamed Khaled bin Nordin រដ្ឋមន្ត្រីការពារជាតិម៉ាឡេស៊ី អំពីស្ថានភាពព្រំដែនកម្ពុជា-ថៃ ដែលប៉ូលីសថៃបានប្រើហិង្សាឡើងលើប្រជាពលរដ្ឋកម្ពុជា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បន្ទាប់ពីភាគីថៃបានរាយបន្លារលួសថ្មីនៅតំបន់មិនទាន់ដោះស្រាយ។

នាឱកាសចូលរួមវេទិកាប៉េកាំងសៀងសាន លើកទី១២ នៅប្រទេសចិន នៅថ្ងៃទី១៨ ខែកញ្ញា ឆ្នាំ២០២៥ ក្នុងជំនួបជាមួយ រដ្ឋមន្ត្រីការពារជាតិម៉ាឡេស៊ី ឯកឧត្តម ទៀ សីហា គូសបញ្ជាក់ថា ស្ថានភាពព្រំដែនកម្ពុជា-ថៃ ដែលប៉ូលីសថៃបានប្រើហិង្សាឡើងលើប្រជាពលរដ្ឋកម្ពុជា នៅភូមិព្រៃចាន់ ឃុំអូរបីជាន់ ជាអំពើដែលខុសពីស្មារតីកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ដែលបានកំណត់ឱ្យដោះស្រាយបញ្ហាខ្សែបន្ទាត់ព្រំដែនតាមរយៈគណៈកម្មាធិការព្រំដែនរួម (JBC)។

ឯកឧត្តម ទៀ សីហា ឧបនាយករដ្ឋមន្ត្រីក៏ បានថ្លែងអំណរគុណដល់រាជរដ្ឋាភិបាលម៉ាឡេស៊ី ដែលបានយកចិត្តទុកដាក់ខ្ពស់លើការជំរុញឱ្យគោរពបទឈប់បាញ់ និងការជំរុញឱ្យក្រុមការងារ IOT Enhance ដឹកនាំដោយអាស៊ាន ចុះពិនិត្យទីតាំងផ្ទាល់។ នេះបើយោងតាម ក្រសួងការពារជាតិ៕