ភ្នំពេញ៖ ព្រះនាង នរោត្តម ចេណ្ណា បានបង្ហាញអំពីអារម្មណ៍នៅលើគេហទំព័រហ្វេសប៊ុកផ្លូវការ ដែលបង្ហាញពីការសោកស្ដាយ និងក្រៀមក្រំនៅពេលដែលឃើញប្រជាជនពលរដ្ឋខ្មែរ កំពុងរងទុក្ខវេទនាពីទង្វើឈ្លានពានរបស់ប្រទេសថៃ ដែលជាប្រទេសជិតខាងរបស់កម្ពុជា។

ព្រះនាង នរោត្តម ចេណ្ណា បានមានបន្ទូលថា៖ «ចំពោះខ្ញុំគ្រាន់តែក្មេងម្នាក់ ខ្ញុំមិនយល់ទេថាយើងកើតជាមនុស្ស មិនថាក្នុងប្រទេសណាក៏ដោយ ក៏ស្រឡាញ់ប្រទេសរបស់ខ្លួនដូចគ្នា ប៉ុន្តែហេតុអ្វីមនុស្សមួយចំនួនមិនអាចរស់នៅដោយសេចក្តីស្ងប់បាន? ចាំបាច់ដណ្ដើមទឹកដីគេ ឈ្លានពាននិងបំផ្លាញជីវិតមនុស្សដទៃ ដែលពួកយើងសុំត្រឹមតែមានជីវិតរស់នៅ ព្រោះពួកយើងគ្រាន់តែចង់មានផ្ទះមានគ្រួសារមានសេចក្តីស្រឡាញ់ និងសន្តិភាពប៉ុណ្ណោះ»។

ព្រះនាង មានព្រះបន្ទូលបន្ថែមទៀតថា៖ «សូមពិភពលោកបានឃើញនូវអំពើឃោរឃៅរំលោភឈ្លានពានយ៉ាងគឃ្លើនរបស់ប្រទេសជិតខាងមកលើទឹកដីខ្មែរ ប្រជាជនខ្មែរស្លូតត្រង់។ ខ្ញុំក៏បួងសួង សូមឱ្យពិភពលោក មានតែសេចក្តីស្រឡាញ់ ក្តីមេត្តា ករុណា និងសន្តិភាពតែប៉ុណ្ណោះ»៕