ភ្នំពេញ៖ ក្រុមហ៊ុនអាកាសចរណ៍ជាតិ Air Cambodia បានសម្រេចយ៉ាងជោគជ័យក្នុងការដំណើរការជើងហោះហើរពាណិជ្ជកម្មលើកដំបូង ជាមួយអ្នកដំណើរជាច្រើន ដោយប្រើយន្តហោះ Airbus-A320 នៅអាកាសយានដ្ឋានអន្តរជាតិតេជោ កាលពីថ្ងៃទី៤ ខែកញ្ញា ឆ្នាំ២០២៥ ។

ការហោះហើរនេះបានប្រព្រឹត្តទៅដោយរលូន ទាំងក្នុងផ្នែកបច្ចេកទេស ការបម្រើ និងបទពិសោធអ្នកធ្វើដំណើរ។ វាជាសញ្ញាបញ្ជាក់ដ៏សំខាន់មួយ នៃការចូលរួមរបស់កម្ពុជា ទៅក្នុងវគ្គថ្មីនៃវិស័យអាកាសចរណ៍។ នេះបើយោងតាម ទូរទស្សន៍ជាតិកម្ពុជា ចេញផ្សាយនៅថ្ងៃទី៥ ខែកញ្ញា ឆ្នាំ២០២៥។

គួរបញ្ជាក់ផងដែរថា អាកាសយានដ្ឋានអន្តរជាតិតេជោ ដែលជាប្រភេទព្រលាន 4F មានសមត្ថភាពទទួលបានការហោះហើរ ពីឆ្ងាយឆ្លងទ្វីប អាចឱ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន នឹងដាក់ឱ្យដំណើរការ នៅថ្ងៃទី៩ ខែកញ្ញា ឆ្នាំ២០២៥ នេះ។ ចំណែកឯពិធីសម្ពោធជាផ្លូវការ នឹងធ្វើឡើងនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាព សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជា៕