ភ្នំពេញ៖ លោក Ritesh Kumar Singh នាយកប្រតិបត្តិតែងតាំងថ្មីរបស់ក្រុមហ៊ុនស្មាត អាស្សាតា (Smart Axiata) ស្នើសុំការបន្តគាំទ្រពីរាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា ពិសេសកិច្ចសម្រួលវិនិយោគបន្ថែមទៀតលើប្រតិបត្តិការក្រុមហ៊ុននៅកម្ពុជា។

ពាក់ព័ន្ធនឹងការបោះទុនវិនិយោគបន្ថែមទៀតនៅកម្ពុជា របស់ក្រុមហ៊ុន Smart Axiata ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ណែនាំឱ្យក្រុមហ៊ុន សហការជាមួយក្រុមប្រឹក្សាអភិវឌ្ឍន៍កម្ពុជា ក្នុងការចូលរួមប្រើប្រាស់នូវសក្តានុពលសេវាដែលខ្លួនមាន ជំរុញការអភិវឌ្ឍសេដ្ឋកិច្ចសង្គមជាតិឱ្យបានកាន់តែល្អប្រសើរឡើងមួយកម្រិតថែមទៀត។ លើសពីនេះ ឯកឧត្តម ស៊ុន ចាន់ថុល បានណែនាំឱ្យក្រុមហ៊ុនសហការជាមួយក្រុមការងារបច្ចេកវិទ្យាឌីជីថលរបស់ក្រុមប្រឹក្សាអភិវឌ្ឍន៍កម្ពុជា លើការធ្វើឌីជីថលូបនីកម្មក្នុងការផ្តល់សេវាសាធារណៈរបស់ស្ថាប័នឱ្យបានកាន់តែប្រសើរបន្ថែមផងដែរ។

ក្រុមហ៊ុន Smart Axiata បានបណ្តាក់ទុនវិនិយោគនៅកម្ពុជា តាំងពីឆ្នាំ២០០៨ ដោយបច្ចុប្បន្នបានបង្កើតការងារដល់ប្រជាពលរដ្ឋជិត ៥ម៉ឺនកន្លែង ទូទាំងប្រទេស បម្រើដល់អតិថិជនជាង ៨លាននាក់ ក្រោយទទួលបានការលើកទឹកចិត្តពីរាជរដ្ឋាភិបាល ស្របតាមការកំណត់ក្នុងច្បាប់ស្តីពីវិនិយោគ នៃកម្ពុជា និងបទដ្ឋានគតិយុត្តជាធរមាន។ ភាពរីកចម្រើនរបស់ក្រុមហ៊ុននេះ បានចូលរួមចំណែកយ៉ាងសកម្មក្នុងការអភិវឌ្ឍន៍សង្គមសេដ្ឋកិច្ចរបស់កម្ពុជាផងដែរ តាមរយៈការចូលរួមបង់ចំណូលថវិកាជាតិ៕