ភ្នំពេញ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ និងអាជ្ញាធរពាក់ព័ន្ធ បានរៀបចំកម្មវិធី «វេទិកាការងារ» ចំនួន ៤០កន្លែង ដែលមានឱកាសការងារចំនួន ១៣ ៣១៥កន្លែង ទៅផ្សព្វផ្សាយដល់ប្រជាពលរដ្ឋ និងពលករខ្មែរទើបត្រឡប់មកពីប្រទេសថៃ។

ក្នុងកម្មវិធី «វេទិកាការងារ» កាលពីថ្ងៃទី១០ ខែសីហា ឆ្នាំ២០២៥ នេះ គឺមានការចូលរួមពីប្រជាពលរដ្ឋចំនួន ១០ ០៨៤នាក់ និងមានអ្នកទទួលបានការងារភ្លាមចំនួន ១ ៩១៦នាក់។ គួរបញ្ជាក់ថា យុទ្ធនាការវេទិកាការងាររបស់ក្រសួងការងារ និងបណ្តុះបណ្តាលវិជ្ជាជីវៈ គិតចាប់ពីថ្ងៃទី២ ខែសីហា រហូតដល់ថ្ងៃទី១០ ខែសីហា ឆ្នាំ២០២៥ បានរៀបចំវេទិកាការងារចំនួន ២៦៩កន្លែង ដោយនាំយកព័ត៌មានឱកាសការងារសរុបចំនួន ១១២ ២៦៧កន្លែង ទៅផ្សព្វផ្សាយជូនប្រជាពលរដ្ឋ និងពលករខ្មែរ ដែលបានចូលរួមវេទិកាផ្សព្វផ្សាយចំនួន ៧៩ ៩១១នាក់ និងមានអ្នកទទួលបានការងារភ្លាមចំនួន ១៥ ៣៣២នាក់៕