ភ្នំពេញ៖ វិស័យកម្មន្តសាល បន្តដើរតួនាទីយ៉ាងសំខាន់ក្នុងការទ្រទ្រង់កំណើនសេដ្ឋកិច្ចកម្ពុជា ដោយមានកំណើន ៩,៥% ក្នុងឆមាសទី១ ឆ្នាំ២០២៥ ខណៈអនុវិស័យកម្មន្តសាលកាត់ដេរ ត្រូវបានប៉ាន់ស្មានថាកើនឡើង ១០,៤% ស្របពេល ដែលអនុវិស័យកម្មន្តសាលមិនមែនកាត់ដេរ កើនឡើង ៨,៥%។ នេះបើតាមរបាយការណ៍របស់ ធនាគារជាតិនៃកម្ពុជា ក្នុងឆមាសទី១ ឆ្នាំ២០២៥។

គួររំលេចផងដែរថា ការនាំចេញផលិតផលកម្មន្តសាល បានកើនឡើងគួរឱ្យកត់សម្គាល់ ១៥,៣% (គិតជាតម្លៃ) នាឆមាសទី១ ឆ្នាំ២០២៥ ធៀបនឹងរយៈពេលដូចគ្នា កាលពីឆ្នាំ២០២៤ ដែលមានត្រឹមតែ ៨,៧% ដោយសារការសម្រុកនាំចេញយ៉ាងគំហុកមុនពេលពន្ធគយបដិការត្រូវបានអនុវត្ត។ កំណើននេះ គាំទ្រជាចម្បងដោយការនាំចេញផលិតផលកាត់ដេរ និងផលិតផលដែលកំពុងលេចឡើង ដូចជាសំបកកង់រយន្ត អំពូលភ្លើង ខ្សែភ្លើង និងបង្គំខ្សែភ្លើង។

សូមជម្រាបថា គិតត្រឹមឆមាសទី១ ឆ្នាំ២០២៥ សេដ្ឋកិច្ចកម្ពុជា បានកើន ៥.៩% បើទោះបីជាប្រឈមនឹងភាពមិនច្បាស់លាស់ពីកត្តាខាងក្រៅខ្លាំងក៏ដោយ។ កំណើននេះ ត្រូវបានគាំទ្រដោយការកើនឡើង នៃវិស័យកម្មន្តសាល ទេសចរណ៍ និងកសិកម្ម ខណៈវិស័យសំណង់ និងអចលនទ្រព្យ បន្តមានភាពទន់ខ្សោយ៕