ភ្នំពេញ៖ ការលើកកម្ពស់វិស័យម្ហូបអាហារ (Gastronomy) តាមរយៈការពង្រឹងសមត្ថភាពអ្នកជំនាញទេសចរណ៍ និងគ្រូបង្គោល ហូកា (HoKa) លើជំនាញចុងភៅ មានបំណងពង្រឹងសមត្ថភាពបច្ចេកទេស និងវិធីសាស្ត្របង្រៀនដល់អ្នកជំនាញចុងភៅនៅតាមខេត្តគោលដៅ ដើម្បីផ្តល់លទ្ធភាពឱ្យពួកគាត់អាចបណ្តុះបណ្តាលបន្តដល់បុគ្គលិកជំនាញក្នុងមូលដ្ឋានរៀងៗខ្លួន។

ក្នុងពិធីបើកវគ្គបណ្តុះបណ្តាល ដែលមានរយៈពេល ៩ថ្ងៃ រួមមានការសិក្សាទ្រឹស្តីរយៈពេល ៥ថ្ងៃតាមប្រព័ន្ធវីដេអូ (Online) និងការអនុវត្តផ្ទាល់រយៈពេល ៤ថ្ងៃ ផ្តោតលើមុខម្ហូបអត្តសញ្ញាណតាមតំបន់ និងបច្ចេកទេសធ្វើទឹកជ្រលក់ផ្សេងៗនេះ ចូលរួមដោយ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគណៈកម្មាធិការគ្រប់គ្រងគម្រោងហូកា (HoKa) រួមជាមួយ លោក ង៉ូវ សេងកាក់ អភិបាលរងខេត្តសៀមរាប និង លោក គង់ ដារ៉ា ប្រធានកម្មវិធីបណ្តុះបណ្តាលនៃអង្គការ Swisscontact ។

សម្រាប់វគ្គទី១ នេះ មានសិក្ខាកាមសរុបចំនួន ១៧រូប មកពីខេត្តគោលដៅចំនួន៨ រួមមាន៖ ក្រចេះ ស្ទឹងត្រែង ព្រះវិហារ មណ្ឌលគិរី រតនគិរី បន្ទាយមានជ័យ ឧត្តរមានជ័យ និងកំពង់ឆ្នាំង ដែលសមាសភាពរួមមានគ្រូបង្គោលហូកាមកពីមន្ទីរទេសចរណ៍ខេត្ត និងវិស័យឯកជន។ ពិធីនេះ ត្រូវបានរៀបចំឡើងនៅថ្នាក់ធ្វើម្ហូបសុភ័ស សង្កាត់ជ្រាវ ក្រុងសៀមរាប ដោយមានការចូលរួមពីតំណាងគ្រឹះស្ថាន TVET សមាគមឧស្សាហកម្មទេសចរណ៍ សណ្ឋាគារ ភោជនីយដ្ឋាន សមាគមចុងភៅកម្ពុជា និងសិក្ខាកាមសរុបចំនួន ៤០ រូប៕