ភ្នំពេញ៖ សហរដ្ឋអាមេរិក បញ្ជាក់ពីជំហររបស់ខ្លួនសាជាថ្មី ក្នុងការគាំទ្របទឈប់បាញ់ រវាងកម្ពុជា-ថៃ ដែលជាគំនិតផ្តួចផ្តើមរបស់ ឯកឧត្តមប្រធានាធិបតី Donald Trump និងដឹកនាំដោយប្រទេសម៉ាឡេស៊ី ដែលជាប្រធានអាស៊ានប្តូរវេន ដោយសហរដ្ឋអាមេរិក សន្យាថានឹងចូលរួមគាំទ្រ ផ្នែកភស្តុភា និងបច្ចេកទេសសំខាន់ៗ ដើម្បីបង្កើតក្រុមការងារអ្នកសង្កេតការណ៍អាស៊ាន (AMT) ឱ្យបានលឿនបំផុត។

ក្នុងជំនួបជាមួយ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងនាយឧត្តមនាវី Samuel Paparo មេបញ្ជាការ បញ្ជាការដ្ឋានឥណ្ឌូប៉ាស៊ីហ្វិក សហរដ្ឋអាមេរិក (USINDOPACOM) ព្រមទាំងឯកឧត្តម Edgard Kagan ឯកអគ្គរដ្ឋទូតសហរដ្ឋអាមេរិក ប្រចាំនៅប្រទេសម៉ាឡេស៊ី កាលពីថ្ងៃទី៦ សីហា ឯកឧត្តមេបញ្ជាការ និងឯកឧត្តម ឯកអគ្គរដ្ឋទូត បញ្ជាក់ថាសហរដ្ឋអាមេរិក នឹងធ្វើការតាមដានយ៉ាងយកចិត្តទុកដាក់បំផុត ដើម្បីអនុវត្តបទឈប់បាញ់ឱ្យដំណើរទៅប្រកបដោយភាពជោគជ័យ និងមានប្រសិទ្ធភាព។

បន្ថែមលើនេះសហរដ្ឋអាមេរិក ក៏បានបង្ហាញពីអ្វីដែលជាការអនុវត្តបន្តរបស់សហរដ្ឋអាមេរិក រួមមាន៖ ការធ្វើផែនការយោធា, គ្រឿងបរិក្ខារ, ប្រព័ន្ធបញ្ជូនកម្លាំង, ប្រព័ន្ធឃ្លាំមើលតាមអាកាស និងសម្ភារបច្ចេកទេសទំនើបជាច្រើនទៀត។ ទាំងនេះគឺជាការបង្ហាញពីការតាំងចិត្តខ្ពស់ និងបានត្រៀមខ្លួនចូលរួម កសាងឱ្យមានសន្តិភាពកើតឡើងពិតប្រាកដ។ នេះបើយោងតាមក្រសួការពារជាតិកម្ពុជា នាថ្ងៃទី៧ ខែសីហា ឆ្នាំ២០២៥៕