ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) ប្រកាសដាក់ឱ្យប្រើប្រាស់ហត្ថលេខាអេឡិចត្រូនិក (e-Signature) និងត្រាអេឡិចត្រូនិក (e-Stamp) លើឯកសារទម្រង់ឌីជីថលចេញពីប្រព័ន្ធគ្រប់គ្រងគម្រោងវិនិយោគកម្ពុជា (ប្រព័ន្ធ cdcIPM) ដោយមានភ្ជាប់ឃ្យូ.អ.កូដ (QR Code) ទៅកាន់ដែនជាតិ .gov.kh ដើម្បីផ្ទៀងផ្ទាត់។

តាមរយៈការនវានុវត្តន៍នេះ រាល់ឯកសារទម្រង់ឌីជីថល ដែលមានកាលបរិច្ឆេទ ចាប់ពីថ្ងៃទី១៨ ខែកក្កដា ឆ្នាំ២០២៥ នេះ អាចទាញយកពីប្រព័ន្ធ cdcIPM ទៅប្រើប្រាស់ និងមានតម្លៃជាឯកសារច្បាប់ដើម ដោយអនុលោមទៅតាមច្បាប់និងបទប្បញ្ញត្តិពាក់ព័ន្ធជាធរមាន។ ចំពោះអ្នកដាក់ពាក្យស្នើសុំ ឬវិនិយោគិន ដែលអនុវត្តគម្រោងវិនិយោគ មិនតម្រូវឱ្យផ្តល់ឯកសារនានា ដែលមានស្រាប់នៅក្នុងឃ្យូ.អ.កូដ នៃឯកសារទម្រង់ឌីជីថលខាងលើ ទៅក្រសួង ស្ថាប័ន រដ្ឋបាលរាជធានី ខេត្ត មន្ទីរ និងអង្គភាពពាក់ព័ន្ធនឹងការចុះបញ្ជីពាក់ព័ន្ធ និងការពិនិត្យអនុលោមភាព នៃការអនុវត្តគម្រោងវិនិយោគទៀតឡើយ។

ប្រព័ន្ធ cdcIPM ត្រូវបានដាក់ឱ្យប្រើប្រាស់ជាផ្លូវការ ប្រមាណជាងមួយឆមាសកន្លងទៅ សម្រាប់ការផ្តល់សេវាចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP)។ ការដាក់ចេញនូវយន្តការបច្ចេកវិទ្យាឌីជីថលនេះ ស្របតាមយុទ្ធសាស្ត្របញ្ចកោណ-ដំណាក់កាល ទី១ ដើម្បីចូលរួមជំរុញការធ្វើបរិវត្តកម្មឌីជីថល កសាងម៉ូដែលថ្មីនៃកំណើន សំដៅពន្លឿននីតិវិធី កាត់បន្ថយពេលវេលាផ្តល់សេវាសាធារណៈ និងបង្កើនទំនុកចិត្តដល់វិនិយោគិន ដែលមានបំណងមកបណ្តាក់ទុនវិនិយោគ នៅកម្ពុជា៕