ភ្នំពេញ៖ លោក សំកុល សុចិត្រា អភិបាលរងខេត្តសៀមរាប បានលើកទឹកចិត្តឱ្យប្រជាពលរដ្ឋបន្តចូលរួមផ្សព្វផ្សាយវិស័យទេសចរណ៍បន្ថែមទៀត ដែលស្របតាមការលើកឡើងរបស់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ គឺ«ប្រជាពលរដ្ឋម្នាក់ ជាអ្នកផ្សព្វផ្សាយទេសចរណ៍កម្ពុជាម្នាក់»។

ក្នុងសិក្ខាសាលាស្តីពីការបង្កើតមាតិកាទេសចរណ៍ឌីជីថល និងបច្ចេកទេសថតរូបដោយប្រើទូរស័ព្ទ កាលពីថ្ងៃទី១៦ ខែកក្កដា ឆ្នាំ២០២៥ ដែលមានការអញ្ជើញចូលរួមពីឯកឧត្តម ហុល សីលា អនុរដ្ឋលេខាធិការក្រសួងទេសចរណ៍ លោក សំកុល សុចិត្រា បានលើកឡើងថា ការរៀបចំឡើងនូវសិក្ខាសាលានាពេលនេះ នឹងទទួលបាននូវលទ្ធផលល្អ និងនាំយកនូវចំណេះដឹងបច្ចេកទេស នៃកាអភិវឌ្ឍខ្លួនបន្ថែមសម្រាប់អ្នកចូលរួម ដើម្បីយកទៅប្រើប្រាស់ឱ្យចំគោលដៅ។

ទន្ទឹមនេះ លោក សំកុល សុចិត្រា ក៏បានលើកឡើងថា ការផលិតវីដេអូផ្សព្វផ្សាយឱ្យទាក់ទាញដល់ភ្ញៀវទេសចរមកទស្សនាប្រទេសកម្ពុជាបន្ថែមទៀត និងធ្វើឱ្យមានកំណើនសេដ្ឋកិច្ចនៅក្នុងខេត្តកាន់តែល្អប្រសើរឡើងជាងនេះ។ ក្នុងសិក្ខាសាលាខាងលើនេះ ក៏មានការអញ្ជើញចូលរួមពីមគ្គុទេសន៍ទេសចរណ៍ អ្នកផលិតមាតិកាក្នុងខេត្តសរុបប្រមាណជាង ១៥០នាក់ ចូលរួមផងដែរ។ នេះបើតាមការចុះផ្សាយរបស់រដ្ឋបាលខេត្តសៀមរាប កាលពីថ្ងៃទី១៧ ខែកក្កដា ឆ្នាំ២០២៥៕