ភ្នំពេញ៖ ភាពបរាជ័យ សឹងតែជារឿងធម្មតាទៅហើយសម្រាប់សហគ្រិន ដែលចាប់ផ្ដើមធុរកិច្ចបង្កើតថ្មី (Startup) មុននឹងបានឃើញចំណូល និងភាពលូតលាស់នៃអាជីវកម្មនោះ សហគ្រិនថ្មីៗគួរត្រៀមខ្លួនឱ្យរួចជាស្រេច ដើម្បីប្រឈម និងបន្ស៊ាំខ្លួនទៅនឹងភាពបរាជ័យនៅកំឡុងពេលអនុវត្តគម្រោងអាជីវកម្ម។

ការបរាជ័យខ្លះអាចនឹងផ្ដាច់ផ្លូវដើររបស់អ្នក តែអ្នកក៏មិនគួរខ្លាចរអាខ្លាំងពេកដែរ ព្រោះគ្រប់ការផ្លាស់ប្ដូរ តែងមានបញ្ហាមកជាមួយជានិច្ច ហើយរាល់បញ្ហាសុទ្ធតែបានបង្រៀនយើងគ្រប់គ្នាឱ្យស្គាល់ពីវិធីសាស្រ្ដដោះស្រាយដែលអាចជាកត្តាប្រឈមនៅពេលក្រោយៗ។ សហគ្រិនខ្មែរ បានចែករំលែកហេតុផលចំនួន ៥ ដែលសហគ្រិនចាប់ផ្ដើមធុរកិច្ចបង្កើតថ្មីៗ មិនគួរខ្លាចភាពបរាជ័យ រួមមាន៖ ទី១ ការបរាជ័យខ្លះ គ្រាន់តែធ្វើឱ្យដំណើរការរអាក់រអួល តែមិនបានបញ្ចប់ផែនការទាំងមូលទេ។ លទ្ធផលនោះ បង្រៀនសហគ្រិនឱ្យកំណត់សម្គាល់ភាពប្រក្រតី និងមិនប្រក្រតី នៃគំនិត និងការអនុវត្តរបស់ពួកគេ។

ចំពោះទី២ ផែនការមិនដំណើរការ អាចជាផ្នែកមួយជំរុញឱ្យសហគ្រិនគិតស៊ីជម្រៅបន្ថែមលើបញ្ហា ដើម្បីរកគន្លឹះដោះស្រាយប្រកបដោយភាពច្នៃប្រតិដ្ឋ និងរៀបផែនការគ្រប់គ្រងហានិភ័យពេលអនាគតបានល្អជាងមុន។ ទី៣ ភាពបរាជ័យខ្លះ ជួយសហគ្រិនឱ្យរឹងមាំ ហ៊ានប្រឈមមុខនឹងបញ្ហា តស៊ូអត់ធ្មត់ និងបន្សាំខ្លួនជាមួយភាពលំបាក។

ដោយឡែកទី៤ ជួនកាលលទ្ធផលមិនសមបំណងទាំងនោះ ក៏បង្រៀនសហគ្រិនឱ្យកំណត់ការរំពឹងទុករបស់ខ្លួនឱ្យសក្តិសមនឹងសមត្ថភាព និងចេះផ្ដល់អាទិភាពដល់ផ្នែកណាមួយដែលសំខាន់ជាងផងដែរ និងទី៥ ការបរាជ័យបង្ហាញពីចំណុចដែលត្រូវតែពង្រឹង និងអភិវឌ្ឍឡើងវិញ ដែលវត្តមាននៃការបរាជ័យមិនមែនសុទ្ធតែអាក្រក់ទាំងអស់នោះទេ ព្រោះនេះអាចជាចំណុចចាប់ផ្ដើម និងជាលទ្ធផលនៃការអនុវត្តសកម្មភាពរបស់សហគ្រិន៕