ភ្នំពេញ៖ ក្រសួងពាណិជ្ជកម្ម ជាមួយនឹងសភាពាណិជ្ជកម្មអង់ការ៉ា និងសភាឧស្សាហកម្មអង់ការ៉ា បានជួបពិភាក្សាអំពីការសម្របសម្រួលជាមួយនឹងក្រសួងស្ថាប័នពាក់ព័ន្ធនៅកម្ពុជា ដើម្បីរៀបចំនូវវេទិកាវិនិយោគនិងធុរកិច្ចរួមគ្នា ការផ្គូរផ្គងធុរកិច្ច ការចែករំលែកព័ត៌មានពាក់ព័ន្ធនឹងតម្រូវការទំនិញនាំចេញ-នាំចូល និងវិស័យឧស្សាហកម្មអាទិភាពរបស់ប្រទេសកម្ពុជានិងតួកគីយ៉េ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២១ ខែមិថុនា ឆ្នាំ២០២៥។

ក្នុងកិច្ចពិភាក្សានេះ ធ្វើឡើងដោយលោក កែវ ប៊ុនថេង អនុព័ន្ធពាណិជ្ជកម្មអមស្ថានឯកអគ្គរាជទូតកម្ពុជាប្រចាំតួកគីយ៉េ លោក Abdurrahman KARABUDAK អគ្គលេខាធិការរងនៃសភាពាណិជ្ជកម្មអង់ការ៉ា និងលោកបណ្ឌិត Ahmet DİNÇER អគ្គលេខាធិការរងនៃសភាឧស្សាហកម្មអង់ការ៉ា ក៏បានលើកឡើងពីការផ្តល់ការសម្របសម្រួលដល់វិនិយោគិននិងធុរជនផងដែរ។

លោក កែវ ប៊ុនថេង ក៏បានបញ្ជាក់អំពីស្ថានភាពម៉ាក្រូសេដ្ឋកិច្ច អត្ថប្រយោជន៍និងសក្តានុពលក្នុងការធ្វើពាណិជ្ជកម្មនិងវិនិយោគនៅក្នុងប្រទេសកម្ពុជា ការលើកទឹកចិត្តនិងការការពារវិនិយោគិន រួមនឹងច្បាប់និងគោលនយោបាយសំខាន់ៗរបស់រាជរដ្ឋាភិបាលកម្ពុជាពាក់ព័ន្ធនឹងពាណិជ្ជកម្មនិងការវិនិយោគផងដែរ៕