ភ្នំពេញ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានលើកឡើងថា ការរៀបចំផែនការ និងការកំណត់គោលដៅអាជីពឱ្យបានច្បាស់លាស់ គឺដើម្បីពង្រឹងការប្រកួតប្រជែងក្នុងទីផ្សារការងារ និងការអភិវឌ្ឍអាជីពយូរអង្វែង។ នេះបើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី២០ ខែមិថុនា ឆ្នាំ២០២៥។

ក្នុងពិធីបើកសិក្ខាសាលាស្តីពី «ការរៀបចំផែនការអាជីព និងការជ្រើសរើសជំនាញសិក្សា» នៅស្រុកសន្ទុក ខេត្តកំពង់ធំ លោកជំទាវបណ្ឌិត ជា សិរី បានផ្តាំផ្ញើសិស្សានុសិស្សឱ្យជ្រើសរើសជំនាញសិក្សាដែលស័ក្តិសមនឹងបុគ្គលិកលក្ខណៈផ្ទាល់ខ្លួន ចំណង់ចំណូលចិត្ត និងតម្រូវការទីផ្សារការងារជាក់ស្តែង។

គួរបញ្ជាក់ថា សិស្សានុសិស្សដែលចូលរួមក្នុងកម្មវិធីនេះ ក៏ទទួលបានសៀវភៅកម្រងសំណួរសម្រាប់ជាជំនួយក្នុងការស្វែងយល់ពីខ្លួនឯង ព្រមទាំងបទពិសោធល្អៗអំពីការសិក្សាពីក្រុមការងារយុវជនធនាគារជាតិនៃកម្ពុជា ដែលធ្លាប់ទទួលបានអាហារូបករណ៍ទៅសិក្សានៅបរទេសថែមទៀតផង៕