ភ្នំពេញ៖ ឯកឧត្តម វ៉ាង វិនពីន ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសចិនប្រចាំកម្ពុជា បានលើកឡើងថា ក្នុងនាមជាមិត្តដែកថែបនៃប្រទេសកម្ពុជា ភាគីចិន នឹងគាំទ្រកម្ពុជារក្សាស្ថិរភាពនិងការអភិវឌ្ឍ ឈានទៅភាពរុងរឿង និងការស្តារឡើងវិញដូចពេលមុន។

តាមការចុះផ្សាយរបស់ឯកឧត្តម វ៉ាង វិនពីន បានសម្តែងក្តីរីករាយ ដែលបានមកចែកចាយសម្ភារជំនួយមនុស្សធម៌ជាបន្ទាន់ ដែលផ្តល់ដោយរដ្ឋាភិបាលចិន ជាមួយនឹងឯកឧត្តម កិត្តិសង្គហបណ្ឌិត គង់ គីម ទេសរដ្ឋមន្ត្រី ទទួលបន្ទុកបេសកកម្មពិសេស អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ដែលសម្ភារជំនួយពីរដ្ឋាភិបាលចិនផ្នែកទីពីរ ក៏នឹងឆាប់ដឹកញ្ចូនដល់កម្ពុជា។

ជាមួយគ្នានេះ ឯកឧត្តម វ៉ាង វិនពីន បានជូនពរប្រជាជនដែលរង់បះពាល់ពីជម្លោះព្រំដែនទាំងឡាយ នឹងត្រឡប់ទៅផ្ទះវិញយ៉ាងឆាប់រហ័ស និងឆ្ពោះទៅរកប្រក្រតីភាពជីវភាពយ៉ាងឆាប់រហ័ស៕