ភ្នំពេញ៖ កម្ពុជា នាំចេញស្រូវអង្ករ បានប្រមាណជាង ៥,៧លានតោន ក្នុងនោះការនាំចេញអង្ករមានចំនួនជាង ៦៥១ពាន់តោន និងស្រូវចំនួនជាង ៥,១លានតោន ដែលមានទំហំទឹកប្រាក់សរុបចំនួនជាង ១ ៩៨៧លានដុល្លារ ក្នុងឆ្នាំ២០២៤។ វិស័យនេះ បានទាញយកការវិនិយោគរបស់វិនិយោគិនក្នុងស្រុក និងក្រៅប្រទេស និងបានជំរុញឱ្យមានការវិនិយោគយ៉ាងគំហុកពីរោងម៉ាស៊ីនកិនស្រូវពីចំនួន ១០ទីតាំង រហូតដល់ទៅជាង ៨០ទីតាំង ដែលបានបំពាក់នូវឧបករណ៍សម្ភារបច្ចេកវិទ្យាទំនើបៗ។

ក្នុងពិធីប្រារព្ធខួប ១០ឆ្នាំ នៃការបង្កើតសហព័ន្ធស្រូវអង្ករកម្ពុជា កំណែទម្រង់មុខមាត់កម្ពុជា លើវិស័យស្រូវអង្ករ កាលពីថ្ងៃទី១៦ ខែមិថុនា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងដូច្នេះថា៖ «គម្រោងព្រែកជីកហ្វូណនតេជោ នឹងជាចំណែកមួយ នៃប្រព័ន្ធភស្ដុភារកម្មកម្ពុជា ក្នុងការជួយសម្រួលដល់ការដឹកជញ្ជូនទំនិញពីកម្ពុជា ទៅទីផ្សារអន្តរជាតិបានកាន់តែឆាប់រហ័ស ជាពិសេសការជំរុញពន្លឿនខ្សែច្រវាក់ផ្គត់ផ្គង់លើការផលិតផលស្រូវអង្កររបស់កម្ពុជា»។

វិស័យស្រូវអង្ករកម្ពុជា បានដើរតួនាទីជាសសរស្តម្ភមួយយ៉ាងសំខាន់ក្នុងការទ្រទ្រង់វិស័យសន្តិសុខស្បៀង និងសេដ្ឋកិច្ច ដែលរយៈពេលជាង ១០ឆ្នាំកន្លងមក វិស័យស្រូវអង្ករកម្ពុជា បានធ្វើឱ្យមានលំនឹងសន្តិសុខស្បៀង និងការពង្រីកសក្តានុពលពាណិជ្ជកម្ម។ ក្រោមគោលនយោបាយដឹកនាំប្រកបដោយចក្ខុវិស័យវែងឆ្ងាយ របស់រាជរដ្ឋាភិបាល នឹងមានការចូលរួមសហការយ៉ាងជិតស្និទ្ធរវាងក្រសួងស្ថាប័នពាក់ព័ន្ធ ដើម្បីជំរុញឱ្យកម្ពុជា ក្លាយទៅជាប្រទេសដើរតួនាទីយ៉ាងសំខាន់លើឆាកអន្តរជាតិក្នុងការនាំចេញអង្ករ ដែលថ្នាក់ដឹកនាំយើងបានប្រសិទ្ធនាមថា «អង្ករ-មាសស»។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា៕