ភ្នំពេញ៖ គណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ សហការជាមួយរដ្ឋបាលខេត្តកំពង់ធំ រៀបចំកម្មវិធីជួបជុំជាមួយក្រុមអាជីវករលក់ម្ហូបអាហារតាមដងផ្លូវ ដើម្បីចាប់ផ្តើមអនុវត្ត «គម្រោងលើកកម្ពស់អនាម័យម្ហូបអាហារតាមដងផ្លូវ»។ នេះបើតាមការចុះផ្សាយរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី១៣ ខែមិថុនា ឆ្នាំ២០២៥។

គម្រោងសាកល្បងនេះ មានគោលដៅពង្រីកឱកាសទីផ្សារសម្រាប់អាជីវករលក់ម្ហូបអាហារក្នុងសេដ្ឋកិច្ចក្រៅប្រព័ន្ធ លើកកម្ពស់សុខភាពសាធារណៈ ទាក់ទាញភ្ញៀវទេសចរ ពិសេសអ្នកធ្វើដំណើរឆ្លងកាត់ខេត្តកំពង់ធំ និងបង្កើតគំរូមួយសម្រាប់ការលក់ម្ហូបអាហារតាមដងផ្លូវនៅក្នុងប្រទេសកម្ពុជា។

ក្នុងកម្មវិធីជួបជុំនេះ ក្រុមអាជីវករបានទទួលការបណ្តុះបណ្តាល ស្តីពីគោលការណ៍អនាម័យម្ហូបអាហារ គោលការណ៍ «ស៥» សម្រាប់រៀបចំកន្លែងអាជីវកម្ម និងការលើកទឹកចិត្តឱ្យអនុវត្តទម្លាប់សាមញ្ញៗមួយចំនួន ដូចជាពាក់ម៉ាស់ និងស្រោមដៃ ដោយមិនត្រូវគិតថាគោលការណ៍អនាម័យទាំងនេះជាបន្ទុកទេ ប៉ុន្តែជានិមិត្តរូបនៃការប្រកបរបរវិជ្ជាជីវៈ ការយកចិត្តទុកដាក់ និងការកសាងទំនុកចិត្តអតិថិជន៕