ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកទឹកចិត្តឱ្យក្រុមហ៊ុន Informa Markets បញ្ចូលបច្ចេកវិទ្យាវេចខ្ចប់ និងដំណោះស្រាយដែលឆ្លើយ​តបនឹងតម្រូវការជាក់ស្តែងរបស់ផលិតករក្នុងស្រុក ជាពិសេសសហគ្រាសធុនមីក្រូ តូច និងមធ្យម។ 

ក្នុងជំនួបនោះ លោក Gerard Leeuwenburgh ប្រធានតំបន់ប្រចាំប្រទេសម៉ាឡេស៊ី និងកម្ពុជា ដែលដឹកនាំតំណាងក្រុមហ៊ុន Informa Markets បង្ហាញអំពីគម្រោងរៀបចំ ពិព័រណ៍បច្ចេកវិទ្យាអាហារកម្ពុជា​ ឆ្នាំ២០២៦ នៅថ្ងៃទី២៨-៣០ ខែកញ្ញា ឆ្នាំ២០២៦ ក្នុងរាជធានីភ្នំពេញ ដែលនឹងផ្តល់ជាវេទិកាអន្តរជាតិ​ដំបូងបង្អស់​នៅកម្ពុជា សម្រាប់ឧស្សាហកម្មកែច្នៃអាហារ បច្ចេកវិទ្យាវេចខ្ចប់ និងការផ្គូផ្គងពាណិជ្ជកម្មក្នុងវិស័យនេះ។ លោក Leeuwenburgh បានលើកឡើងថា ក្រុមហ៊ុនមានបំណងវិនិយោគរយៈពេលវែងនៅ​កម្ពុជា និងផ្សារភ្ជាប់គោលនយោបាយរាជរដ្ឋាភិបាលជាមួយនឹងធុរកិច្ច តាមរយៈពិព័រណ៍។  

ជាមួយគ្នានេះ ឯកឧត្តម ហែម វណ្ណឌី បានស្វាគមន៍ចំពោះគំនិតផ្តួចផ្តើមរបស់ក្រុមហ៊ុន ដោយលើកឡើងថា ពិព័រណ៍​នេះ​ស្របនឹងរបៀបវារៈជំរុញការធ្វើទំនើបកម្មឧស្សាហកម្មរបស់កម្ពុជា ដែលក្នុងនោះ ក្រសួងគាំទ្រគ្រប់វេទិកាដែលជួយសម្រួលដល់ការផ្ទេរបច្ចេកវិទ្យា លើកកម្ពស់សហគ្រាសធុនតូច និងមធ្យម និងបង្កើនភាពប្រកួតប្រជែងក្នុងការនាំចេញនៃឧស្សាហកម្មកែច្នៃអាហារ។ ឯកឧត្តម ហែម វណ្ណឌី ក៏បានបញ្ជាក់អំពីព្រឹត្តិការណ៍ជាតិសំខាន់ៗ ដែលក្រសួងនឹងរៀបចំនាពេលខាងមុខ រួមទាំង «ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី៤» និង «ទិវាជាតិសហគ្រាសធុនមីក្រូ តូច និងមធ្យម» ដែលជាការបំពេញបន្ថែមដ៏ល្អសម្រាប់គោលដៅនៃកម្មវិធីពិព័រណ៍របស់ក្រុមហ៊ុន។

គួរបញ្ជាក់ថា ក្រុមហ៊ុន Informa Markets គឺជាផ្នែកមួយនៃ Informa PLC ដែលជាក្រុមហ៊ុនរៀបចំពិព័រណ៍ឈានមុខ​មួយលើពិភពលោក ដោយមានបុគ្គលិករាប់ពាន់នាក់ និងមានប្រតិបត្តិការពិព័រណ៍ជាមួយក្រុមហ៊ុន និងម៉ាកយីហោអន្តរជាតិជាច្រើន៕