ភ្នំពេញ៖ ឯកឧត្តម អ៊ុំ កុសល អនុរដ្ឋលេខាធិការនៃក្រសួងពាណិជ្ជកម្ម ស្នើឱ្យសាជីវកម្មហិរញ្ញវត្ថុអន្តរជាតិ (IFC) ប្រចាំកម្ពុជា ចូលរួមសហការអនុវត្តយន្តការសម្របសម្រួលរវាងដៃគូអភិវឌ្ឍន៏ជាមួយក្រសួងពាណិជ្ជកម្ម ដើម្បីពង្រឹងកិច្ចសហប្រតិបត្តិការ ការអនុវត្តគម្រោង និងកម្មវិធីពាក់ព័ន្ធនានាក្នុងវិស័យពាណិជ្ជកម្មនៅកម្ពុជា។

ក្នុងជំនួបពិភាក្សាការងារ កាលពីថ្ងៃទី១៣ ខែឧសភា ឆ្នាំ២០២៥ ជាមួយលោកស្រី ថូហ្វីកា ហ៊ុក (Mrs. Tofiqua Hoque) តំណាងសាជីវកម្មហិរញ្ញវត្ថុអន្តរជាតិ (IFC) ប្រចាំកម្ពុជា ឯកឧត្តម អ៊ុំ កុសល បានលើកឡើងអំពីគោលបំណងសំខាន់ក្នុងការរៀបចំបង្កើតយន្តការសម្របសម្រួលជាមួយដៃគូអភិវឌ្ឍន៍ក្នុងវិស័យពាណិជ្ជកម្មនៅកម្ពុជា។

ឯកឧត្តម អ៊ុំ កុសល បានថ្លែងអំណរគុណដល់សាជីវកម្មហិរញ្ញវត្ថុអន្តរជាតិ (IFC) និងជំនួយនានារបស់ IFC សម្រាប់ការអភិវឌ្ឍវិស័យពាណិជ្ជកម្មនៅកម្ពុជា ក្នុងនោះឯកឧត្តម ក៏បានបញ្ជាក់ថា ការគាំទ្រទាំងនេះ បានចូលរួមចំណែកយ៉ាងសំខាន់ក្នុងការអភិវឌ្ឍវិស័យពាណិជ្ជកម្ម កសាងសមត្ថភាពពាណិជ្ជកម្ម និងជំរុញកំណើនសេដ្ឋកិច្ចនៅកម្ពុជា ផងដែរ៕