ភ្នំពេញ៖ «Data Mining» គឺត្រូវបានប្រើប្រាស់ក្នុងសកម្មភាពសំខាន់ៗចំនួនបី រួមមាន៖ ទី១.ការស្វែងរកសកម្មភាពក្លែងបន្លំ ត្រូវបានប្រើប្រាស់ក្នុងស្ថាប័ន ដូចជាក្រុមហ៊ុនធានារ៉ាបរង ធនាគារ និងស្ថាប័នហិរញ្ញវត្ថុនានា សម្រាប់វិភាគគំរូប្រតិបត្តិការនិងអាកប្បកិរិយារបស់អតិថិជន ដើម្បីកំណត់អត្តសញ្ញាណប្រតិបត្តិការមិនប្រក្រតី និងកំណត់ករណីក្លែងបន្លំដែលអាចកើតមាន។

ចំពោះទី២.ការថែទាំសុខភាព សម្រាប់វិស័យសុខាភិបាល ដែល Data Mining ត្រូវបានប្រើប្រាស់ក្នុងការវិភាគកំណត់អត្រាសុខភាព, ទិន្នន័យរូបភាពវេជ្ជសាស្រ្ត និងការសាកល្បងព្យាបាលជាដើម។ បច្ចេកវិទ្យានេះ ជួយក្នុងការវិភាគលទ្ធផលជំងឺ, កំណត់កត្តាហានិភ័យ, ពង្រឹងផែនការព្យាបាល និងស្វែងរកប្រតិកម្មអវិជ្ជមានដែលអាចកើតមានឡើង។

ចំណែក ទី៣៖ ការគ្រប់គ្រងទំនាក់ទំនងអតិថិជន អ្នកជំនាញ CRM ប្រើប្រាស់ Data Mining ដើម្បីជួយក្នុងការកំណត់អតិថិជនគោលដៅ និងពង្រឹងយុទ្ធសាស្រ្តទីផ្សារផ្ទាល់ខ្លួន តាមរយៈការវិភាគប្រជាសាស្រ្ត អាកប្បកិរិយា និងចំណូលចិត្តរបស់អតិថិជន ដែលអនុញ្ញាតឱ្យអ្នកជំនាញអាចកែសម្រួលយុទ្ធសាស្រ្តទីផ្សាររបស់ខ្លួនទៅតាមចំណង់ចំណូលចិត្តរបស់អតិថិជន។ នេះបើយោងតាមគេហទំព័រKhmer Tech Market៕