ភ្នំពេញ៖ ក្រុមហ៊ុន Haw Sung Tech-Win Co.,Ltd របស់ប្រទេសកូរ៉េ បង្ហាញពីបំណងចង់សិក្សាស្វែងយល់ពីសក្តានុពលវិនិយោគ និងការបង្កើតរោងចក្រដោយប្រើប្រាស់បច្ចេកវិទ្យាថ្មីទំនើប ក្នុងការកែច្នៃសំបកគ្រាប់ធុញ្ញជាតិធ្វើជាប្រេង និងកែច្នៃសំរាមនិងសំណល់ប្លាស្ទិក ធ្វើជាជីធម្មជាតិ ព្រមទាំងសម្ភារប្រើប្រាស់នៅកម្ពុជា។

ជាមួយគ្នានេះ លោក Eui-Young Lee ប្រធានក្រុមហ៊ុន Haw Sung Tech-Win Co.,Ltd បានវាយតម្លៃចំពោះភាពជោគជ័យនៃការដាក់ចេញយុទ្ធនាការកាត់បន្ថយការប្រើប្រាស់ប្លាស្ទិក និងបានដោះស្រាយបញ្ហាប្លាស្ទិក នៅតាមទីសាធារណៈរបស់ក្រសួងបរិស្ថាន ដើម្បីជំរុញឱ្យមានការទុកដាក់សំរាម សំណល់រឹង និងសំណល់ប្លាស្ទិក ពិសេសកាត់បន្ថយសំរាម និងសំណល់ប្លាស្ទិក នាពេលអនាគតនៅកម្ពុជា។

ក្នុងជំនួបពិភាក្សាជាមួយលោក Eui-Young Lee ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានអរគុណចំពោះក្រុមហ៊ុនដែលមានបំណងវិនិយោគនិងកែច្នៃសំរាម និងសំណល់ប្លាស្ទិក ដែលជួយជំរុញការវិនិយោគបៃតងនៅកម្ពុជា។ ឯកឧត្តមបណ្ឌិត អ៊ាង សុផល្លែត ក៏បានស្នើឱ្យក្រុមហ៊ុនបន្តធ្វើការជាមួយមន្រ្តីជំនាញ ដើម្បីសិក្សាស្វែងយល់ពីតំបន់វិនិយោគ ដែលមាននៅកម្ពុជា៕