ភ្នំពេញ៖ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ជូនដំណឹងដល់អាជីវករ និងប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី គឺអាចទិញត្រីចាប់ពីថ្ងៃទី២ ដល់ថ្ងៃទី១០ ខែមករា ឆ្នាំ២០២៥ បាន បើក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង។

រដ្ឋបាលជលផល បានឱ្យដឹងថា រដូវនេសាទ ឆ្នាំ២០២៤-២០២៥នេះ បន្ទាប់ពីខ្នើតខែ មិគសិរកន្លងមក ត្រី បានបន្តបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលធ្វើឱ្យអំណោយផលដល់ការធ្វើនេសាទបានត្រី ពិសេសគន្លងដាយត្រីតាមដងទន្លេសាប នៅភូមិសាស្ត្រខេត្តកណ្តាល និងរាជធានីភ្នំពេញ។

រដ្ឋបាលជលផល បានអំពាវនាវដល់អាជ្ញាធរមូលដ្ឋាន ឬសមត្ថកិច្ចពាក់ព័ន្ធ មេត្តាជួយសម្រួលចរាចរណ៍ដល់ប្រជាពលរដ្ឋ ដែលបានធ្វើដំណើរ ស្នាក់នៅ និងដឹកជញ្ជូនផលិតផលត្រីដោយរលូតផងដែរ៕