ភ្នំពេញ៖ កម្មវិធី «មហោស្រពមិត្តភាពកម្ពុជា-ចិន ២០២៤» ដែលរៀបចំដោយផ្ទះយុវជនដើម្បីមិត្តភាពកម្ពុជា-ចិន(YHCCF) ផ្តល់ឱកាសឱ្យសហគ្រិនប្រទេសទាំងពីរ អាចស្វែងរកឱកាសពាណិជ្ជកម្ម និងការវិនិយោគជាមួយគ្នា ក្រោមកិច្ចព្រមព្រៀងពាណិជ្ជកម្មសេរីកម្ពុជា-ចិន។ នេះបើតាមការចុះផ្សាយរបស់សហគ្រិនវ័យក្មេងកម្ពុជា កាលពីថ្ងៃទី១៩ ខែធ្នូ ឆ្នាំ២០២៤។

កម្មវិធីមហោស្រពមិត្តភាពកម្ពុជា-ចិន ដែលប្រព្រឹត្តឡើង ក្រោមការសហការជាមួយមូលនិធិចិនដើម្បីសន្តិភាពនិងការអភិវឌ្ឍន៍ (CFPD) នេះ មានគោលបំណងលើកកម្ពស់ការផ្លាស់ប្តូរសិល្បៈ វប្បធម៌ និងប្រជាជន ពង្រឹងការយល់ដឹងពីគ្នា ដើម្បីកសាងទំនុកចិត្តនិងមិត្តភាពរវាងកម្ពុជា និងចិនផងដែរ។ ក្នុងកម្មវិធីនេះ ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេង ក៏បានស្នើរសុំទៅកាន់ថ្នាក់ដឹកនាំចិន ក្នុងការផ្តល់អាហារូបករណ៍កាន់តែច្រើនដល់និស្សិតខ្មែរ ជាពិសេសសហគ្រិនខ្មែរ ដើម្បីទទួលបានឱកាសកាន់តែច្រើនឡើងរវាងប្រទេសទាំងពីរទៀតផង។

ក្នុងពិធី ដែលធ្វើឡើងនៅស្ថិតនៅសណ្ឋាគារ បុរីអង្គរសៀមរាប ឧកញ៉ា ប៉ិច បូឡែន ក៏បានចូលរួមជាវាគ្មិននៅក្នុងកិច្ចពិភាក្សាស្ដីពី «វេទិកាផ្លាស់ប្តូរយុវជន និងវប្បធម៌» ដោយផ្ដោតលើការបំផុសគំនិតយុវជនជំនាន់ក្រោយរបស់កម្ពុជា និងចិន ឱ្យមានការចូលរួមចែករំលែកបទពិសោធល្អៗ សិក្សាស្វែងយល់ពីវប្បធម៌កាន់ ការលើកកម្ពស់ភាពច្នៃប្រឌិត និងបង្កើតបណ្តាញទំនាក់ទំនង ដើម្បីរក្សាបាននូវមិត្តភាពរវាងប្រទេសទាំងពីរ៕