ភ្នំពេញ៖ ឯកឧត្ដម សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងថា កម្ពុជា កំពុងស្រូបទាញវិនិយោគិនឱ្យមកឆក់ឱកាសបណ្តាក់ទុនវិនិយោគលើវិស័យដែលមានសក្តានុពលរួមមាន៖ កសិ-ឧស្សាហកម្ម, ភស្តុភារកម្ម, កម្មន្តសាលធុនស្រាល, សុខាភិបាល និងថាមពលកកើតឡើងវិញជាដើម។

ក្នុងជំនួបជាមួយ Sumitomo Mitsui Banking Corporation របស់ជប៉ុន តំណាងដោយ លោក Hironori Shimojima អនុប្រធានទទួលបន្ទុកកិច្ចការអាស៊ីប៉ាស៊ីហ្វិក ឯកឧត្ដម សួន សុផល បានបន្តថា ក្រុមការងារតុជប៉ុន (Japan Desk) នៃCDC នឹងសហការជាមួយ Sumitomo Mitsui Banking Corporation ដើម្បីរួមគ្នាបំពេញបេសកកម្មជំរុញ និងទាក់ទាញវិនិយោគិនជប៉ុនឱ្យមកបណ្តាក់ទុនវិនិយោគនៅកម្ពុជាក្នុងឆ្នាំ២០២៥ខាងមុខទៀតផង។

ជាមួយគ្នានេះ លោក Hironori Shimojima បានបញ្ជាក់ថា នឹងជួយជំរុញឱ្យតំណាង Sumitomo Mitsui Banking Corporation នៅរាជធានីភ្នំពេញ ពិនិត្យលទ្ធភាពពង្រឹងកិច្ចសហការឱ្យកាន់តែប្រសើរឡើង។ លោក Hironori Shimojima សង្ឃឹមថាក្រុមប្រឹក្សាអភិវឌ្ឍន៍កម្ពុជា នឹងវិលត្រឡប់ទៅប្រទេសជប៉ុននាពេលខាងមុខ ដើម្បីបន្តបេសកកម្មទាក់ទាញ និងជំរុញវិនិយោគបន្ថែមទៀត។ នេះបើតាមការចុះផ្សាយរបស់ CDC នាថ្ងៃទី១១ ខែធ្នូ ឆ្នាំ២០២៤៕