ភ្នំពេញ៖ ឯកឧត្តម ហែម វណ្ណឌីជំរុញឱ្យរដ្ឋាករទឹកស្វយ័តសៀមរាប លើកកម្ពស់ប្រសិទ្ធិភាពប្រតិបត្តិការអាជីវកម្ម រួមមានយុទ្ធសាស្រ្តបង្កើនតំណប្រើប្រាស់ទឹកស្អាត, ការគាំទ្រដល់អាជីវកម្មក្នុងស្រុក រួមជាមួយវិស័យបដិសណ្ឋារកិច្ច និងការគាំទ្រប្រតិបត្តិករទឹកស្អាតឯកជនទាំង១០នៅក្នុងខេត្ត លើការតេស្តគុណភាពទឹក។

រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងបែបនេះ ក្នុងដំណើរទស្សនកិច្ចរោងចក្រប្រព្រឹត្តិកម្មទឹកស្អាតជ្រាវ ដែលស្ថិតនៅសង្កាត់ជ្រាវ ក្រុងសៀមរាប នៃខេត្តសៀមរាប។ រោងចក្រប្រព្រឹត្តិកម្មទឹកស្អាតជ្រាវ ដែលជាហេដ្ឋារចនាសម្ព័ន្ធទឹកស្អាតដ៏សំខាន់មួយរបស់រដ្ឋាករទឹកស្វយ័តសៀមរាប ត្រូវបានដាក់ឱ្យដំណើរការក្នុងឆ្នាំ២០២៣ បានបង្កើនសមត្ថភាពផលិតទឹកស្អាតរបស់ខ្លួនបីដង គឺពី ៣០ ០០០ម៉ែត្រគូបក្នុងមួយថ្ងៃ ទៅ ៩០ ០០០ម៉ែត្រគូបក្នុងមួយថ្ងៃ។ ការបង្កើនសមត្ថភាពនេះ ត្រូវបានព្យាករណ៍ថានឹងបំពេញតម្រូវការទឹកស្អាតសម្រាប់ក្រុងសៀមរាប និងតំបន់ជុំវិញរហូតដល់ឆ្នាំ២០៣០។

តាមការចុះផ្សាយរបស់ក្រសួងឧស្សាហកម្ម នាថ្ងៃទី២៦ កក្កដា បានឱ្យដឹងថា បច្ចុប្បន្ន រដ្ឋាករទឹកស្វយ័តសៀមរាប កំពុងផ្តល់សេវាផ្គត់ផ្គង់ទឹកស្អាតដល់អតិថិជនតាមផ្ទះ និងមូលដ្ឋានអាជីវកម្មចំនួន ២៤ ៤៧៦ ទីតាំង ដែលមានបណ្តាញចែកចាយទឹកស្អាតប្រវែង ៤៨៩ គីឡូម៉ែត្រ៕