ភ្នំពេញ៖ កំពង់ផែកោះកុង ផតមេនេចម៉ិន ឯ.ក (Koh Kong Port Management Co Ltd) ត្រូវបានដាក់ឱ្យដំណើរការសាកល្បង និងទទួលស្វាគមន៍នាវាទី១ កាលពីថ្ងៃទី២៥ ខែកញ្ញា ឆ្នាំ២០២៣នេះ។ កំពង់ផែ ដែលស្ថិតនៅឃុំកោះស្តេច ស្រុកគិរីសាគរនោះ នឹងដើរតួនាទីសំខាន់ក្នុងការសម្រួលដល់ការដឹកជញ្ជូនទំនិញ, ផលិតផលសិកម្ម និងអ្នកទេសចរណ៍នៅតំបន់ឆ្នេរផងដែរ។

អភិបាលរង នៃគណៈអភិបាលខេត្តកោះកុង លោកស្រី អ៉ី នារីនេត បានឱ្យដឹងនៅក្នុងពិធីកាត់ខ្សែបូដាក់ឱ្យដំណើរការសាកល្បង និងទទួលស្វាគមន៍នាវាទី១ ចូលមកកាន់កំពង់ផែកោះកុង ផតមេនេចម៉ិន ឯ.ក នេះ ថា ការកសាងហេដ្ឋរចនាសម្ព័ន្ធកំពង់ផែនេះ ធ្វើឡើងក្នុងគោលបំណងសម្រួលការដឹកជញ្ជូនទំនិញ អ្នកដំណើរ អ្នកទេសចរណ៍ នៅតាមតំបន់ឆ្នេរសមុទ្រ ប្រកបដោយសុវត្ថិភាព និងប្រសិទ្ធភាព។

លោកស្រី អ៉ី នារីនេត បានបន្ថែមថា កំពង់ផែដែលវិនិយោគដោយក្រុមហ៊ុនឯកជនមួយនេះ នឹងដើរតួនាទីយ៉ាងសំខាន់ដើម្បីសម្រួលដល់ការដឹកជញ្ជូនទំនិញ ឬផលកសិកម្មរបស់ប្រជាពលរដ្ឋ ដែលបាននិងកំពុងតែប្រកបរបរកសិកម្មនៅមូលដ្ឋាន សំដៅដល់ការលើកកម្ពស់ជីវភាពរបស់ប្រជាកសិករនៅក្នុងខេត្តកោះកុង ឱ្យកាន់តែមានភាពល្អប្រសើរ និងទទួលបានជីវភាពធូរធារជាងមុន។ មធ្យោយបាយដឹកជញ្ជូន គឺជាសរសៃឈាមសេដ្ឋកិច្ចដ៏សំខាន់មិនអាចខ្វះបាន ក្នុងការអភិវឌ្ឍសេដ្ឋកិច្ចជាតិ និងការលើកស្ទួយជីវភាពរបស់ប្រជាពលរដ្ឋ៕