ភ្នំពេញ៖ លោក ឮ ចាន់ណូរ៉ា បុរាណវិទូ និងជាមន្រ្តីនៃអាជ្ញាធរជាតិអប្សរា បានឱ្យដឹងថា ប្រាសាទអូរថ្មដាប់ គឺមានគម្រោងជួសជុលរយៈពេល ៤ខែ ដោយក្រុមផ្នែកអភិរក្ស បានជួសជុលនៅផ្នែកខាងកើត​ដែលមានស្នាមប្រេះ​ចាប់ពីហោជាងខាងក្រោមដល់កំពូលខាងលើ និងដំឡើងខ្លោងទ្វារថ្មភក់ ផ្តែរ សសរពេជ្រ រួមនឹងពង្រឹងស្នាមប្រេះ​នៅផ្នែកខាងលិច ក្នុងនោះ ក្រុមការងារ ក៏បាន​សម្អាតរុក្ខជាតិ​ដែលនៅផ្នែកកំពូលឱ្យបានស្អាតផងដែរ។

លោក ឮ ចាន់ណូរ៉ា បានឱ្យដឹងថា ប្រាសាទអូរថ្មដាប់ ដែលមានរូបរាងពេញល្អ និងមានក្បាច់លម្អក្រឡោតខ្ពស់នៅតាមជ្រុងនីមួយៗ ដែលភ្ញៀវទេសចរអាចទៅទស្សនាបាននេះ ក្រុមការងារបានដំឡើង​ខ្លោងទ្វារឡើងវិញ ដែលជាការបន្ថែមសោភ័ណភាពប្រាសាទ និងទាក់ទាញដល់អ្នកទេសចរ​ចូលទៅទស្សនាឱ្យកាន់តែច្រើន។ ប្រាសាទនេះ ជាប្រាសាទមួយក្នុងចំណោម​ប្រាសាទឥដ្ឋ​តិចតួចនៅលើភ្នំគូលែន ដែលបន្សល់នូវរូបរាងពេញលេញ ក្រៅពីនោះ គឺនៅសល់ស្នាកស្នាមបន្តិចបន្តួច ដូចជាគ្រឹះ ឬគំនរឥដ្ឋប៉ុណ្ណោះ។

ប្រាសាទអូរថ្មដាប់ ដែលមានអាយុកាលជាង ១២០០ឆ្នាំ មិនធ្លាប់មានការជួសជុលឡើយនេះ គឺគ្រាន់តែធ្លាប់មានការសិក្សាស្រាវជ្រាវផ្នែកបុរាណវិទ្យា និងការថែទាំទល់ទ្រសម្អាតជាប្រចាំប៉ុណ្ណោះ។ មុនពេលជួសជុលប្រាសាទនេះ មានការប្រេះហែកផ្នែកខាងកើតពីក្រោមដល់លើ និងស្រុតថ្មជាដើម។ ជាមួយគ្នានេះ អាជ្ញាធរជាតិអប្សរា គឺតែងតែយកចិត្តទុកដាក់ និងជំរុញឱ្យក្រុមការងាររៀបចំគម្រោងជួសជុលប្រាសាទនៅតំបន់ភ្នំគូលែនជាហូរហែ លោក ឮ ចាន់ណូរ៉ា អះអាងថា ការងារនេះ ដើម្បីអភិរក្សប្រាសាទបុរាណផង និងលើកស្ទួយវិស័យទេសចរណ៍នៅតំបន់ភ្នំគូលែនផង៕