ភ្នំពេញ៖ កម្ពុជា-សាធារណរដ្ឋកូរ៉េ ពិភាក្សាគ្នាពង្រឹង និងពង្រីកកិច្ចសហប្រតិបត្តិការទ្វេភាគី លើវិស័យ សេដ្ឋកិច្ច វិនិយោគ ពាណិជ្ជកម្ម ការពារជាតិ និងសន្តិសុខ ឧស្សាហកម្ម ការរៀបចំតំបន់សេដ្ឋកិច្ចពិសេសសម្រាប់សហគ្រាសកូរ៉េ ការផ្លាស់ប្តូរប្រជាជន និងការជំរុញទេសចរណ៍រវាងប្រទេសទាំងពីរ។

ក្នុងកិច្ចពិភាក្សាជាមួយ ឯកឧត្តម Cho Hyun រដ្ឋមន្ត្រីការបរទេសសាធារណរដ្ឋកូរ៉េ សម្តេចធិបតី ហ៊ុន ម៉ាណែត បានអរគុណចំពោះរដ្ឋាភិបាលកូរ៉េ ដែលយកចិត្តទុកដាក់ដល់ប្រជាពលរដ្ឋកម្ពុជា ដែលកំពុងរស់នៅ និងធ្វើការនៅកូរ៉េ។ សម្ដេចធិបតីនាយករដ្ឋមន្រ្តី ក៏បានបញ្ជាក់ដែរថា សុខសុវត្ថិភាព និងសុខុមាលភាពរបស់ប្រជាជនកូរ៉េ ដែលកំពុងរស់នៅ និងធ្វើការនៅកម្ពុជា ក៏ជាអាទិភាពខ្ពស់របស់រាជរដ្ឋាភិបាលកម្ពុជា។

ជាមួយគ្នានេះ សម្ដេចធិបតី ហ៊ុន ម៉ាណែត បន្តលើកឡើងថា កន្លងមក កូរ៉េ បានរួមចំណែកយ៉ាងសកម្មដល់ការស្ដារ និង អភិវឌ្ឍ សង្គម-សេដ្ឋកិច្ច របស់ប្រទេសកម្ពុជាឱ្យមានភាពរីកចម្រើន។ ដំណើរទស្សនកិច្ចផ្លូវការរបស់ឯកឧត្តមរដ្ឋមន្ត្រី និងគណៈប្រតិភូ នៅកម្ពុជានាឱកាសនេះ គឺជាកត្តាជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែស៊ីជម្រៅបន្ថែមទៀត។ នេះបើតាមប្រសាសន៍របស់ សម្តេចធិបតី ហ៊ុន ម៉ាណែត នាថ្ងៃទី១០ ខែវិច្ឆិកា ឆ្នាំ២០២៥៕