ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តដល់ប្រជាកសិករ ដែលមិនទាន់ចូលជាសហគមន៍កសិកម្មទំនើប ពិចារណាចងក្រង ដើម្បីស្ដារមកវិញ ទទួលបានអត្ថប្រយោជន៍ជាច្រើន ជាពិសេសការធានាតម្លៃទីផ្សារតម្លៃសមរម្យតាមការចុះកិច្ចសន្យាទុកមុន ការកាត់បន្ថយថ្លៃដើមផលិតកម្ម ការទទួលទុនកម្ចីការប្រាក់ទាប និងការផ្ដល់ជំនួយបច្ចេកទេស។

ការលើកឡើងរបស់ ឯកឧត្តម ឌិត ទីណា ខាងលើ ធ្វើឡើងក្នុងឱកាសជួបសំណេះសំណាលជាមួយប្រជាកសិករជាសមាជិកនៃសហគមន៍កសិកម្មទំនើបស្រូវប្រព័ន្ធធារាសាស្ត្រកង្ហត នៅស្រុកសង្កែ ខេត្តបាត់ដំបង ដែលកំពុងត្រៀមចាប់ផ្ដើមផលិតកម្មស្រូវស្រងែតាមកិច្ចសន្យាក្នុងតម្លៃ៩៥០៛ ក្នុងមួយគីឡូក្រាម នាថ្ងៃទី៣០ ខែតុលា ឆ្នាំ២០២៥។ នេះបើតាមការចុះផ្សាយរបស់ ក្រសួងកសិកម្ម៕