ភ្នំពេញ៖ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា រៀបចំកិច្ចប្រជុំច្រកចេញចូលតែមួយ ពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៨គម្រោង ដែលមានទុនវិនិយោគសរុប ៧៤,៣លានដុល្លារ និងអាចបង្កើតការងារបានប្រមាណ ៤,៤ពាន់កន្លែង។

គ្រោងទាំង ៨នេះ បានបោះទីតាំងនៅភ្នំពេញ ខេត្តតាកែវ កំពង់ស្ពឺ និងកំពង់ឆ្នាំង និងមានមុខសញ្ញាវិនិយោគក្នុងវិស័យកសិ-ឧស្សាហកម្មចំនួន ១គម្រោង (កែច្នៃកសិផល និងផលិតចំណីអាហារពីកសិផល) និងវិស័យឧស្សាហកម្មចំនួន ៧គម្រោង ដោយផលិតឧបករណ៍តេស្តអគ្គិសនី និងសីតុណ្ហភាព, ឧបករណ៍រង្វាស់, ផលិតសម្ភារសត្វចិញ្ចឹម (ពីប្លាស្ទិក), ផលិតសម្ភារបរិក្ខារប្រើប្រាស់ក្នុងផ្ទះបាយគ្រប់ប្រភេទ, ផលិតសម្ភារបន្ទាប់បន្សំរថយន្ត និងកប៉ាល់, ផលិតប្រដាប់ប្រដារក្មេងលេង និងផលិតសម្ភារបន្ទាប់បន្សំសម្រាប់ចង្ក្រាន្ត និងទូចង្ក្រាន្ត ពីលោហធាតុកែច្នៃ។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា នាថ្ងៃទី៣០ ខែតុលា ឆ្នាំ២០២៥៕