ភ្នំពេញ៖ កសិដ្ឋានគិរីសួគ៌ មានសមត្ថភាពផលិតទឹកដោះគោស្រស់ចន្លោះពី ១២,០០០ ទៅ ១៥,០០០ លីត្រ ក្នុងមួយថ្ងៃ ដែលផ្គត់ផ្គង់បានប្រមាណ ២០% នៃចំណែកទីផ្សារកម្ពុជា ក្នុងពេលបច្ចុប្បន្ន។ នេះបើតាមការចុះផ្សាយរបស់ រដ្ឋបាលខេត្តតាកែវ កាលពីថ្ងៃទី២៨ ខែកញ្ញា ឆ្នាំ២០២៥។

ក្នុងឱកាសដឹកនាំគណៈប្រតិភូរដ្ឋបាលខេត្តតាកែវ ចុះសិក្សាស្វែងយល់អំពីចង្វាក់ផលិតកម្ម ផលិតទឹកដោះគោស្រស់ ១០០% ម៉ាកសញ្ញា (គិរីសួគ៌) របស់ ក្រុមហ៊ុន Khmer Fresh Milk Co., Ltd. ស្ថិតនៅភូមិឱភាសាំង ឃុំកណ្ដឹង ស្រុកបាទី ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បាន សរសើរយ៉ាងខ្លាំងចំពោះកសិដ្ឋានគីរីសួគ៌ ដែលប្រើប្រាស់បច្ចេកទេសកសិកម្មទំនើបក្នុងការចិញ្ចឹមគោ និងផលិតទឹកដោះគោស្រស់ ប្រកបដោយគុណភាព និងអនាម័យខ្ពស់ ហើយជាស្នាដៃកូនខ្មែរពិតៗ៕