ភ្នំពេញ៖ វិទ្យាស្ថាន Bendigo Kangan នៃប្រទេសអូស្ត្រាលី និងវិទ្យាស្ថានបច្ចេកទេស TVET នៃក្រសួងការងារ និងបណ្តុះបណ្តាលវិជ្ជាជីវៈ នឹងមានកិច្ចសហការលើកកម្ពស់គុណភាពកាន់តែប្រសើរ លើការបណ្តុះបណ្តាលបច្ចេកទេសយានយន្តដល់ប្រជាជនកម្ពុជា ពិសេសរថយន្តអគ្គិសនី។ នេះបើតាមការចុះផ្សាយរបស់ក្រសួងការងារ នាថ្ងៃទី២៦ ខែវិច្ឆិកា ឆ្នាំ២០២៤។

តាមរយៈកិច្ចសហការនេះ ឯកឧត្តម ហេង សួរ រដ្ឋមន្រ្តីក្រសួងការងារ ជឿជាក់ថា នឹងអភិវឌ្ឍន៍មូលធនមនុស្សនៅកម្ពុជា ប្រកបដោយជំនាញបច្ចេកទេសស្របតាមស្តង់ដាអន្តរជាតិ និងមិនត្រឹមតែអាចបំពេញតម្រូវការអ្នកបច្ចេកទេសយានយន្តសម្រាប់កម្ពុជាប៉ុណ្ណោះទេ តែក៏អាចស្របតាមទីផ្សារការងារផ្នែកបច្ចេកទេសយានយន្តនៅក្រៅប្រទេសផងដែរ។ ឯកឧត្តម ហេង សួរ ក៏បានបញ្ជាក់ថា រាជរដ្ឋាភិបាលកម្ពុជា មានចក្ខុវិស័យទាក់ទាញការវិនិយោគលើវិស័យយានយន្ត ដូចនេះការបង្កើនមូលធនមនុស្សប្រកបដោយជំនាញបច្ចេកទេស គឺជាគោលនយោបាយដ៏សំខាន់។

លោកស្រី សលលី ឃូថែន (Sally Curtain) រំពឹងថា បទពិសោធក្នុងការបណ្តុះបណ្តាលរបស់វិទ្យាស្ថាន Bendigo Kangan នៃប្រទេសអូស្ត្រាលី នឹងអាចសហការបានយ៉ាងល្អជាមួយវិទ្យាស្ថានបច្ចេកទេស TVET នៅកម្ពុជា ក្នុងការលើកកម្ពស់គុណភាពកាន់តែប្រសើរ ក្នុងការបណ្តុះបណ្តាលបច្ចេកទេសយានយន្តនៅកម្ពុជា៕