ភ្នំពេញ៖ ក្រុមហ៊ុនកម្ពុជា Air Cambodia និងក្រុមហ៊ុនចិន Commercial Aircraft Corporation of China, Ltd.,(COMAC) ចុះអនុស្សរណៈនៃការយោគយល់គ្នា (MoU) អំពីការគ្រោងទិញយន្តហោះដែលផលិតដោយចិនផ្ទាល់ គឺ C909 regional ចំនួន ២០គ្រឿង។

បើតាមការបញ្ជាក់របស់ ឯកឧត្តម Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំកម្ពុជា ក្នុងចំណោមយន្តហោះ ២០គ្រឿងនេះ កម្ពុជា នឹងបញ្ជាទិញចំនួន ១០គ្រឿង និងចំនួន ១០គ្រឿងផ្សេងទៀត គឺមានបំណងបញ្ជាទិញ។ ជាមួយគ្នានេះ ភាគីកម្ពុជា-ចិន គ្រោងសហការគ្នាលើការបញ្ជាទិញយន្តហោះ ការគាំទ្រប្រតិបត្តិការ និងបណ្ដុះបណ្ដាលផលិតកម្មជាដើម។

ឯកឧត្តម Wang Wenbin លើកឡើង កាលពីថ្ងៃទី១០ ខែកញ្ញា ថា ការបញ្ជាទិញយន្តហោះនេះផងដែរ ជាវឌ្ឍនភាពថ្មីនៃកិច្ចសហប្រតិបត្តិការក្នុងវិស័យដែនអាកាសនៃប្រទេសទាំងពីរ ដែលមានអត្ថប្រយោជន៍សំខាន់សម្រាប់ភាគីទាំងពីរ៕