ភ្នំពេញ៖ សហគមន៍កសិកម្មទំនើប លើកទឹកចិត្តឱ្យសមាជិកចុះកិច្ចសន្យាដាំពូជក្នុងស្រុក តែក្នុងករណីដែលអាចទទួលបានតម្លៃនិងលក្ខណ្ឌល្អ ទោះបីជាស្រូវពូជOM ក៏សហគមន៍ទំនើបរបស់យើងនៅតែអាចផលិតលក់ជូនបានដែរ សំខាន់ឱ្យតែកសិករយើងចំណេញច្រើនជាងមុន។ នេះបើតាមការលើកឡើងរបស់ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម និងនេសាទ។

ជាមួយគ្នានេះ ឯកឧត្តម ឃឹម ហ្វីណង់ បានសង្ឃឹមថានឹងមានកសិកររឹតតែច្រើនមើលឃើញពីអត្ថប្រយោជន៍នៃសហគមន៍កសិកម្មទំនើប និងស្ម័គ្រចូលរួមចងក្រងផលិតរួមគ្នាតាមកិច្ចសន្យានៅរដូវកាលក្រោយៗ ជាពិសេសដើម្បីជៀសវាងបញ្ហាហានិភ័យថ្លៃទីផ្សារដូចពេលបច្ចុប្បន្ន។ ក្រុមការងារនៃក្រសួងកសិកម្មត្រៀមខ្លួនរួចជាស្រេចដើម្បីជួយរៀបចំបង្កើតជាសហគមន៍កសិកម្មទំនើបជូនដល់កសិករ។

លើសពីនេះ ឯកឧត្តម ឃឹម ហ្វីណង់ បានចុះពិនិត្យមើលការប្រមូលផលនៃសហគមន៍កសិកម្មទំនើប«អភិវឌ្ឍដំណាំស្រូវកំពង់ធំ» នៅសង្កាត់ស្រយ៉ូវ ខេត្តកំពង់ធំ ដែលខុសពីសហគមន៍ទំនើបដទៃ សហគមន៍មួយនេះដាំស្រូវប្រភេទOM4900 និងបានចុះកិច្ចសន្យាទុកជាមុនជាមួយក្រុមហ៊ុនBRM ក្នុងតម្លៃ១០០០៛/គីឡូក្រាម៕