ភ្នំពេញ៖ ស្ថានទូតជប៉ុនប្រចាំកម្ពុជា បានសង្ឃឹមថា ប្រជាពលរដ្ឋដែលរងប៉ះពាល់ពីជម្លោះព្រំដែនកម្ពុជា-ថៃ នឹងវិលត្រលប់ទៅរកជីវភាពប្រក្រតីឡើងវិញឆាប់ៗ។ នេះបើតាមការចុះផ្សាយរបស់ស្ថានទូតជប៉ុនប្រចាំកម្ពុជា នាថ្ងៃទី៣០ ខែកក្កដា ឆ្នាំ២០២៥។

ជាមួយគ្នានេះ ស្ថានទូតជប៉ុនប្រចាំកម្ពុជា បានចូលរួមដំណើរទស្សនកិច្ចនៅតំបន់កងពលធំអន្តរាគមន៍លេខ៣ ខេត្តព្រះវិហារ ដើម្បីពិនិត្យស្ថានភាពជាក់ស្តែងអំពីស្ថានការណ៍តំបន់ព្រំដែន ក្នុងនាមជាសមាជិកភ្នាក់ងារអនុព័ន្ធយោធា ប្រចាំភ្នំពេញ (MACPP) ដែលរៀបចំដោយក្រសួងការពារជាតិ នៅថ្ងៃទី៣០ កក្កដានេះ។

ទន្ទឹមនឹងនេះ ស្ថានទូតជប៉ុន បានចូលរួមរំលែកទុក្ខចំពោះវិញ្ញានក្ខន្ធអ្នកដែលបានពលីជីវិតក្នុងបព្វហេតុការប៉ះទង្គិចក្នុងជម្លោះតាមព្រំដែនថ្មីៗនេះ និងបង្ហាញនូវការសោកស្តាយយ៉ាងជ្រាលជ្រៅ ចំពោះអ្នកដែលបានរងផលប៉ះពាល់។ លើសពីនេះ រដ្ឋាភិបាលជប៉ុន នឹងបន្តលើកទឹកចិត្តប្រទេសកម្ពុជា និងថៃ ដើម្បីជំរុញការអនុវត្តយ៉ាងប្រាកដប្រជានូវកិច្ចព្រមព្រៀងបទឈប់បាញ់ និងបន្ធូរបន្ថយភាពតានតឹង ដោយសម្របសម្រួលជាមួយប្រទេសពាក់ព័ន្ធ៕