ភ្នំពេញ៖ ក្រុមហ៊ុនអេមរុរ៉ាយស៍(AMURU RICE) និងសហភាពសហគមន៍កសិកម្មបាត់ដំបង ខេត្តបាត់ដំបង សហគមន៍កសិកម្មព្រៃម្រ៉ីនៃក្តីសង្ឃឹម ខេត្តកំពង់ធំ និងសហគមន៍កសិកម្មទំនប់ម្កាក់អភិវឌ្ឃន៍ថ្មី ខេត្តសៀមរាប បានចុះកិច្ចសន្យាផលិតកម្មកសិកម្មក្នុងការផលិត និងផ្គត់ផ្គង់ស្រូវស្តង់ដារផលិតកម្មស្រូវប្រកបដោយនិរន្តភាព នៅខេត្តបាត់ដំបង។

ការអនុវត្តកិច្ចសន្យាខាងលើ គឺផលិត និងផ្គត់ផ្គង់ស្រូវ បរិមាណសរុបចំនួន ១៩ ៥០០តោន ក្នុងនោះមានប្រភេទស្រូវសែនក្រអូប ស្រូវផ្តារំដួល និងស្រូវស្រង៉ែស្រាលក្រអូប លើផ្ទៃដីទំហំ ២ ៤២៨ហិកតា ដោយទទួលបានតម្លៃបុព្វលាភចំនួន ៧២រៀល/គីឡូក្រាម សម្រាប់ប្រភេទស្រូវសែនក្រអូប និង ៤០រៀល/គីឡូក្រាម សម្រាប់ប្រភេទស្រូវផ្តារំដួល និងស្រូវស្រង៉ែស្រាលក្រអូប។ នាពេលបច្ចុប្បន្ននេះ ក្រុមហ៊ុនកំពុងទទួលទិញបានស្រូវពីសហគមន៍បានចំនួនប្រមាណ ២ ៦០០តោន និងសហគមន៍កំពុងបន្តប្រមូលផលនិងផ្គត់ផ្គង់ជូនក្រុមហ៊ុនតាមបរិមាណដែលបានព្រមព្រៀងក្នុងកិច្ចសន្យា៕