ភ្នំពេញ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានរំពឹងថាពិព័រណ៍ «THE BEST OF INDIA EXPO 2025» នឹងក្លាយជាវេទិកា ដើម្បីពង្រឹងការតភ្ជាប់អាជីវកម្ម ជំរុញសកម្មភាពពាណិជ្ជកម្ម និងវប្បធម៌នៃភាពជាដៃគូដោយផ្អែកលើស្មារតីជឿជាក់គ្នា និងសហការគ្នារវាងកម្ពុជា-ឥណ្ឌា។ នេះបើតាមការចុះផ្សាយរបស់ក្រសួងពាណិជ្ជកម្ម​ កាលពីថ្ងៃទី២០ ខែសីហា​ ឆ្នាំ២០២៥។

ក្នុងពិធីបើកសម្ពោធព្រឹត្តិការណ៍ពិព័រណ៍ «THE BEST OF INDIA EXPO 2025» នេះ លោកជំទាវ ចម និម្មល បានបន្តថា ក្នុងបរិការណ៍បច្ចុប្បន្ន ព្រឹត្តិការណ៍ពិព័រណ៍នេះ កំពុងដើរតួនាទីយ៉ាងសំខាន់ក្នុងការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ រវាងកម្ពុជានិងឥណ្ឌា។ ពិព័រណ៍នេះ បានស្តែងឱ្យឃើញពីទំនាក់ទំនងយ៉ាងជិតស្និទ្ធរវាងប្រទេសទាំងពីរ ក៏នឹងជួយបង្កើនតម្លៃបន្ថែម ដោយនាំមកនូវកាលានុវត្តភាពរួមគ្នាលើផ្នែកពាណិជ្ជកម្មនិងវិនិយោគ ព្រមទាំងការស្វែងរកកិច្ចសហការ ដើម្បីផលប្រយោជន៍រួមនៃប្រទេសទាំងពីរ ជាពិសេសលើប្រភេទផលិតផលសម្លៀកបំពាក់ សិប្បកម្ម ព្រំ គ្រឿងអលង្ការ សម្ភារៈតុបតែងផ្ទះ ប្រដាប់ប្រដាក្មេងលេង និងផលិតផលពិសេស Çភូមិមួយ ផលិតផលមួយÈ របស់ឥណ្ឌា។

លោកជំទាវរដ្ឋមន្ត្រីក្រសួងពាណិជ្ជកម្ម ក៏បានគូសបញ្ជាក់ថា ពិព័រណ៍ ÇBEST OF INDIA EXPO 2025È ជានិមិត្តរូបនៃអនាគតរួម​ ដែលកម្ពុជា និងឥណ្ឌា ប្រកបដោយវិបុលភាព ការរួបរួម និងផ្តល់ផលប្រយោជន៍ឱ្យគ្នាទៅវិញទៅមក។ លោកជំទាវរដ្ឋមន្ត្រី រំពឹងថាពិព័រណ៍នេះនឹងក្លាយជាវេទិកា ដើម្បីពង្រឹងការតភ្ជាប់អាជីវកម្ម ជំរុញសកម្មភាពពាណិជ្ជកម្ម និងវប្បធម៌នៃភាពជាដៃគូដោយផ្អែកលើស្មារតីជឿជាក់គ្នា និង និងសហការគ្នា៕