ភ្នំពេញ៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានជំរុញឱ្យឯកអគ្គរដ្ឋទូតប្រទេសឥណ្ឌូនេស៊ី ជួយកៀរគរវិនិយោគិនឱ្យមកវិនិយោគនៅខេត្តកំពង់ចាមឱ្យបានច្រើន និងជំរុញឱ្យមានកិច្ចសហការចងមេត្រីភាពរវាងខេត្តកំពង់ចាមជាមួយបណ្តាខេត្តនៃប្រទេសឥណ្ឌូនេស៊ី ដើម្បីផ្លាស់ប្តូរការវិនយោគ ផលិតផលទៅវិញទៅមក។ នេះបើយោងតាមការចុះផ្សាយរបស់រដ្ឋបាលខេត្តកំពង់ចាម នាថ្ងៃទី១១ ខែមីនា ឆ្នាំ២០២៥។

ក្នុងជំនួបជាមួយឯកឧត្តម SANTO DARMOSUMARTO ឯកអគ្គរដ្ឋទូត នៃប្រទេសឥណ្ឌូនេស៊ី ប្រចាំកម្ពុជា ឯកឧត្តម អ៊ុន ចាន់ដា ក៏បានលើកឡើងពីសក្តានុពល ភូមិសាស្ត្រ សេដ្ឋកិច្ច និងបង្ហាញពីវឌ្ឍនភាព សមិទ្ធផលរបស់រដ្ឋបាលខេត្តកំពង់ចាមផងដែរ។ ជាមួយគ្នានេះ ឯកឧត្តម SANTO DARMOSUMARTO បានបញ្ជាក់ថា នឹងជួយកៀរគរវិនិយោគិនឥណ្ឌូនេស៊ី មកវិនិយោគនៅខេត្តកំង់ចាមផងដែរ៕