ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តឱ្យប្រជានេសាទនិងសហគ្រាស គិតគូរអំពីការប្រើប្រាស់ធនធានជលផល តាមរយៈការកែច្នៃសម្រាប់បម្រើដល់តម្រូវការទីផ្សារក្នុងស្រុក និងសម្រាប់នាំចេញទៅកាន់ទីផ្សារអន្តរជាតិ។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី០៥ ខែកុម្ភៈ ឆ្នាំ២០២៥។

ក្នុងពិធីប្រគល់កញ្ចប់កម្មវិធីហិរញ្ញវត្ថុគាំទ្រការវិនិយោគ (ISF) និងដាក់ឱ្យដំណើរការប្រព័ន្ធអង្កេតតាមដានឌីជីផលកម្ពុជា (CamTrace) ឯកឧត្តម ឌិត ទីណា បានលើកឡើងថា ពាក់ព័ន្ធនឹងពាណិជ្ជកម្មធនធានជលផល សហគ្រាស ត្រូវចេះថែរក្សាទីផ្សារឱ្យបានល្អ គោរពតាមលក្ខខណ្ឌស្តង់ដាត្រឹមត្រូវ ដែលមានគុណភាពល្អ មានអនាម័យខ្ពស់ និងបង្កើនសមត្ថភាពទៅតាមតម្រូវការទីផ្សារ ជាពិសេសទីផ្សារអឺរ៉ុប ដែលជាទីផ្សារមួយដ៏ល្អសម្រាប់ការនាំចេញ។

ទន្ទឹមនឹងនេះ ឯកឧត្តមរដ្ឋមន្ត្រីក្រសួងកសិកម្ម ក៏បានអំពាវនាវដល់បណ្តាធនាគារផ្សេងៗឱ្យគិតគូរ ចូលរួមផ្តល់ជាទុនកម្ចីសម្រាប់សហគ្រាសក្នុងអនុវិស័យជលផល ដែលមានការធានាត្រឹមត្រូវ និងផ្តល់ផលចំណេញទាំងអស់គ្នា។ ឯកឧត្តម ឌិត ទីណា ក៏បានអរគុណដល់សហភាពអឺរ៉ុប អង្គការ UNIDO សាជីវកម្មធានាឥណទានកម្ពុជា (CGCC) ធនាគារ និងវិស័យឯកជន ដែលបានជួយគាំទ្រនូវតម្រូវការបច្ចេកទេស ទុនហិរញ្ញប្បទាន និងដោះស្រាយបញ្ហាប្រឈមនានាក្នុងវិស័យកសិកម្មផងដែរ៕